قرآن کریم میں یوں مرقوم ہے کہ نماز قائم رکھو اور زکوٰۃ دیا کرو اور رکوع کرنے والوں کے ساتھ (مل کر) رکوع کیا کرو، اے ایمان والو! صبر اور نماز کے ذریعے (مجھ سے) مدد چاہا کرو، یقیناً اﷲ صبر کرنے والوں کے ساتھ (ہوتا) ہے، یہی وہ لوگ ہیں جن پر ان کے رب کی طرف سے پے در پے نوازشیں ہیں اور رحمت ہے، اور یہی لوگ ہدایت یافتہ ہیں۔
رسول اللہ صلی اللہ علیہ وسلم نے فرمایا !۔جس نے نماز کی پابندی نہ کی ، نماز نہ اس کے لیے روشنی اور برہان ہو گی اور نہ جہنم سے نجات کا ذریعہ ہو گی بلکہ روز قیامت وہ قارون، فرعون،ہامان اور ابی بن خلف جیسے نافرمانوں کے ساتھ ہو گا۔‘‘جس نے نمازکی حفاظت کی، روز قیامت نماز اس کے لیے نوراور برہان ہو گی اور نجات کا ذریعہ بن جائے گی۔
اسلام کے پانچ ارکان میں سے کلمہ طیبہ کے بعد دوسرا رکن نماز ہے، نماز کی اہمیت کا اندازہ اس بات سے لگایا جاسکتا ہے کہ ربّ تعالیٰ نے اپنے کلام پاک قرآنِ مجید میں سات سو سے زائد مرتبہ نماز کا ذکرفرمایا ہے، جہاں نماز پڑھنے والوں کے لیے بہت سی انعامات کی بشارت ہے، وہیں اس کو چھوڑنے، سستی برتنے،اس سے روگردانی کرنے والے کے لئے سزائیں بھی ہیں۔
اللہ تعالیٰ کے حکم اور سزاؤں کے باوجود آج اکثر لوگ کوئی نہ کوئی بہانہ بناکر نماز سے فرار کی راہ تلاش کرتے ہیں لیکن سوشل میڈیا پر وائرل اس خوبصورت تصویر نے نماز نہ پڑھنے والوں کو ایک خوبصورت پیغام دیا ہے۔
ایک ننھا سا بچہ خود جائے نماز پر سجدہ کررہا ہے اور ساتھ ہی بچے نے اپنے دوستوں یعنی کھلونوں کو بھی اس طرح رکوع میں جھکایا ہوا ہے۔اس خوبصورت تصویر کو سوشل میڈیا صارفین نے بہت سراہا اور نماز نہ پڑھنے والوں کو سیکھنے کا مشورہ بھی دیا ہے۔