پاکستان میں پیر کے روزبجلی کے طویل بریک ڈاؤن کے دوران صحافی بھی بری طرح متاثر ہوئے، بجلی کی بندش سے معمولات زندگی درہم برہم ہونے پر معروف صحافی طلعت حسین نے پوری ویڈیو بنادی۔
طلعت حسین کا کہنا تھا کہ ہم نے اپنے گھر پر جنریٹر لگوایا تھا کیونکہ ہمیں معلوم تھا کہ ملک میں بجلی کا بڑا بحران آنے والا ہے، صرف ہم نے ہی نہیں بلکہ دوسرے لوگوں نے بھی جنریٹر لگوالئے ہیں۔
انہوں نے بتایا کہ میرے گھر کا جنریٹر صبح سے 10 بار خراب ہوچکا ہے اور پیسے دیکر اس کی مرمت کروائی، جنریٹر خراب ہونے کی وجہ یہ ہے کہ فیول میں کچرا آرہا ہے۔ جنریٹر لگوانے کے بعد ہم نے گھر کے تمام یو پی ایس نکلوا دیئے تھے اور اب جنریٹر بند ہونے کی صورت میں تمام معمولات ٹھپ ہوجاتے ہیں۔
طلعت حسین کا کہنا تھا کہ میں نے اپنا پڑھائی لکھائی کا کام اندھیرے میں کیا اور پروڈکشن کا کام چھت پر جاکر کیا، انہوں نے کہا کہ عوام نے حکومت پر تکیہ کرنا چھوڑ دیا ہے، سیکورٹی کیلئے گارڈز اپنے رکھے ہیں، ٹرانسپورٹ اپنی ہے، تعلیم کا بندوبست خود کرتے ہیں اور اب حالات ایسے ہوگئے ہیں کہ بجلی بھی خود پیدا کرنا ہوگی۔
انہوں نے بتایا کہ گھر میں گیس نہ ہونے کی وجہ سے چولہا بھی بند ہے، چارجنگ نہ ہونے سے فون بند ہوچکا ہے، انٹرنیٹ کی سہولت معطل ہے، ٹی وی نہیں چل سکتا اس لئے آج میرا تمام کام ٹھپ ہے۔