پاکستان میں جینے کے ساتھ ساتھ مرنا بھی مشکل ہوچکا ہے، انسان کے مرتے ہی گھر والوں پر خرچے کا ایک نیا بوجھ آجاتا ہے، قبر اور کئی روز کھانوں پر لاکھوں کے اخراجات آتے ہیں۔
غریب آج کھانے کو بھی محتاج ہے اور اگر کسی کی میت ہوجائے تو اس کی آخری رسومات کیلئے مزید قرض میں دب جاتا ہے، پاکستان میں اس وقت قبرستانوں میں قبر کی قیمت 10 ہزار سے شروع ہوتی ہے اور 50 ہزار سے ڈیڑھ لاکھ تک قبر کی فیس لی جاتی ہے۔
مرنے والے کے اہل خانہ کے پاس چاہے اپنے کھانے کیلئے نہ ہو لیکن میت پر آنے والوں کو بریانی، قورمہ اور دیگر کھانوں سے کئی روز تواضع کرنا لازمی ہوتا ہے۔
حیرت کی بات تو یہ ہے کہ فوتگی والے گھر میں بھی لوگ بریانی اور قورمے میں بوٹیوں کیلئے اکثر لڑتے دکھائی دیتے ہیں اور آجکل امراء کے علاوہ مڈل کلاس لوگوں میں بھی میت پر بوفے لگاکر کھانے کا رواج بڑھ رہا ہے۔
ایسے میں پنجاب کے ایک گاؤں چیچہ وطنی دیہہ چک نمبر 12/11ایل کے مکینوں نے متفقہ فیصلہ کیا ہے کہ آئندہ میت پر لوگوں کو سادہ کھانا دیا جائیگا۔ فیصلے کے مطابق پورے گاؤں میں کسی بھی میت کی صورت میں مہمانوں کو سادہ دالیں اور چنے کا سالن دیا جائیگا۔ مہنگائی کے اس دور میں پنجاب کے ایک چھوٹے سے گاؤں کا یہ فیصلہ پورے ملک کیلئے ایک قابل تقلید مثال ہے۔