پی سی بی ابھی تک ایشیا کپ اور ورلڈ کپ کے بارے میں غیر یقینی صورتحال سے دوچار ہے لیکن بھارتی کرکٹ کنٹرول بورڈ نے جو منصوبہ بندی کی ہے اس کے مطابق اکتوبر میں ایشیا کپ سری لنکا میں ہوگا جبکہ ورلڈ کپ میں پاکستان کے میچ موہالی، نئی دہلی اور دھرم شالا میں کرانے کی تجویز ہے۔ اس سے قبل کولکتہ اور چنئی کے نام بھی میڈیا میں آچکے ہیں۔
جنگ اخبار کے مطابق بی سی سی آئی کے ذرائع کا کہنا ہے کہ اگر پاکستان کرکٹ بورڈ اپنی ٹیم پاکستان بھیجنے کی حامی بھرتا ہے تو موہالی ، نئی دہلی اور دھرم شالا کے نام فائنل ہوچکے ہیں۔ یہ تینوں شہر شمالی بھارت میں واقع ہیں۔
سکیورٹی نقطہ نظر سے پاکستان کے لئے محفوظ ہیں اور ان شہروں میں فاصلہ کم ہونے کی وجہ سے پاکستان ٹیم کو زیادہ سفر بھی نہیں کرنا پڑے گا۔ کولکتہ اور چنئی میں فاصلہ زیادہ ہے۔
ممبئی میں بی سی سی آئی کے ہیڈ کوارٹر میں ورلڈکپ میچز ان تین شہروں جبکہ ایشیا کپ سری لنکا میں کرانے کی تجویز سامنے آرہی ہے۔ جون میں اس بارے میں فیصلہ ہونے کا امکان ہے۔
جون میں انگلینڈ میں آئی سی سی بورڈ میٹنگ کے ساتھ ایشین کرکٹ کونسل کی میٹنگ بھی کرانے کی کوشش کی جارہی ہے۔