اسلام آباد:چیئرمین عمران خان کے بعد تحریک انصاف کے سیکریٹری جنرل اسد عمر بھی گرفتار، وائس چیئرمین شاہ محمود کی گرفتاری کا بھی خدشہ، فورسز اسد عمر کو لے کر روانہ ہوگئیں۔
تحریک انصاف کے رہنما اسد عمر اور شاہ محمود قریشی عمران خان سے ملاقات کی درخواست لے کر اسلام آباد ہائیکورٹ آئے تھے جہاں سے اسلام آباد پولیس کے اینٹی ٹیررسٹ اسکواڈ نے اسد عمر کو گرفتار کرلیا۔
تحریک انصاف کے وکلا نے اسد عمر کی گرفتاری پر مزاحمت کی کوشش کی جس پر فورسز اور وکلا کے درمیان دھکم پیل بھی ہوئی اور اہلکار اسد عمر کو لے کر روانہ ہوگئے۔
پاکستان تحریک انصاف کے تقریباً تمام اہم رہنماؤں کیخلاف مختلف تھانوں میں مقدمات موجود ہیں، شاہ محمود قریشی، فواد چوہدری سمیت دیگر کی گرفتاری کا امکان ہے۔
دوسری جانب پی ٹی آئی کے کئی رہنماؤں نے ضمانت کیلئے عدالت سے بھی رجوع کر رکھا ہے۔
یاد رہے کہ گزشتہ روز عمران خان کی نیب کیس میں گرفتاری کے بعد احتجاج کے دوران کراچی میں پی ٹی آئی سندھ کے صدر و سابق وفاقی وزیر علی حیدر زیدی اور شاہنواز جدون کو بھی گرفتار کرلیا گیا تھا۔