ہمیں اکثر آن لائن ویب سائٹس پر کچھ مصنوعات ایسی نظر آتی ہیں جن کی قیمت، اصل قیمت سے بہت مختلف اور بہت زیادہ ہوتی ہے۔ اور بعض اوقات تو یہ قیمتیں لاکھوں میں بھی ہوتی ہیں، جسے دیکھ کر انسان کی سوچ حیران رہ جائے کہ آخر اس میں ایسا کیا ہے۔
لیکن اس بار تو حد ہی ہوگئی، کیونکہ ایک امریکی کمپنی دیسی چارپائی کو "روایتی ہندوستانی پلنگ" کے طور پر فروخت کر رہی ہے۔
جی ہاں! امریکی آن لائن اسٹور 'ایٹسے' پر معمولی چارپائی کی قیمت 1 لاکھ 12 ہزار 168 روپے منظر عام پر آئی ہے۔
آن لائن اسٹورنے اپنے پلیٹ فارم پر اس کو فروخت کیلئے پیش کیا ہے جسے اگر عام بازار سے خریدا جائے تو 10، 12 ہزار کی آرام سے خریدی جاسکتی ہے لیکن انہوں نے اس کی قیمت ایک لاکھ روپے سے زائد لگائی ہے۔ چارپائی کا یہ اشتہار وائرل ہو گیا ہے۔
اشتہار میں چارپائی کو بہت خوبصورتی کے ساتھ بستر کے طور پر درج کیا ہے اور بتایا گیا ہے کہ، یہ ہاتھ سے تیار کردہ پروڈکٹ ہے جسے لکڑی اور جوت کی چھالوں سے بنی رسیوں سے بنایا گیا ہے۔ ساتھ ہی چارپائی کی لمبائی چوڑائی اور استعمال شدہ مواد کے بارے میں بھی لکھا گیا ہے۔
حیران کن بات تو یہ ہے کہ، اتنی مہنگی چارپائی ہونے کے باوجود وہب سائٹ کا دعویٰ ہے کہ پہلے ہی پانچ صارفین کی جانب سے یہ چارپائی بُک ہوچکی ہے۔
تاہم، یہ پہلا واقعہ نہیں ہے کہ کسی چیز کو اتنا مہنگا فروخت کیا جائے، ایمازون پر 93450 روپے میں 28 فیصد ڈسکاؤنٹ کے ساتھ ایک بالٹی کا اشتہار لگا تھا اسکے علاوہ لگژری برانڈ نے 1.4 لاکھ کی قیمت والے ڈسٹ بن بیگ سے متاثر اپنے پاؤچ سے صارفین کو حیران کر دیا تھا۔