وزیراعلی پنجاب کے مشیر برائے کھیل اور قومی کرکٹر وہاب ریاض نے گزشتہ روز گاڑی چلاتے ہوئے شہریوں پر پانی اڑائے جانے کے عمل پر عوام سے معافی مانگ لی۔
سماجی رابطے کی ویب سائٹ ٹوئٹر پر جاری کردہ ٹویٹ میں انہوں نے گزشتہ روز سوشل میڈیا پر وائرل ہونے والی ویڈیو سے متعلق اظہار خیال کیا۔ اںہوں نے لکھا کہ کل جو کچھ ہوا اس پر مجھے افسوس ہے۔
وہاب ریاض کا کہنا تھا کہ ‘سکے کے ہمیشہ دو رخ ہوتے ہیں لیکن بدقسمتی سے ہم ہمیشہ صرف غلط رخ کو ہی دیکھتے ہیں۔ کل جو ہوا وہ مکمل طور پر غیر ارادی تھا جسے غلط طریقے سے سمجھا گیا۔’
قومی کرکٹر نے پیغام دیتے ہوئے کہا کہ ‘ ہمیشہ مثبت سوچ پھیلانے کی کوشش کریں اور منفی پروپیگنڈے کے ذریعے اپنے اس خوبصورت ملک کو بدنام نہ کریں۔’
There are always two sides of the coin, but unfortunately we always see the wrong one only. I’m sorry for what happened yesterday, it was purely unintentional and was misperceived in a very wrong way. Let’s try to spread positivity always and not malign this beautiful country of…
— Wahab Riaz (@WahabViki)
خیال رہے کہ گزشتہ روز وہاب ریاض کی لاہور کی سڑک پر گاڑی چلاتے ہوئے ایک ویڈیو وائرل ہوئی تھی۔ ویڈیو میں انکی گاڑی سے سڑک پر موجود موٹر سائیکل سواروں پر پانی اڑتے دیکھا جاسکتا ہے۔
وہاب ریاض کی یہ ویڈیو سوشل میڈیا پر وائرل ہونے کے بعد انہیں شدید تنقید کا سامنا بھی کرنا پڑا۔