آسٹریلیا اور انگلینڈ کے درمیان جاری ایشز سیریز کے دوران کھلاڑیوں کے درمیان جاری تناؤ کے بعد نیٹو سمٹ میں دونوں ممالک کے وزرائے اعظم کی بھی لڑائی ہوگئی۔
لیتھونیا میں نیٹو سمٹ کے دوران آسٹریلوی وزیراعظم انتھونی البنیز اور برطانوی وزیراعظم رشی سوناک کے درمیان ملاقات میں دونوں نے ایک دوسرے کو کارڈز دکھا کر ایشز سیریز میں اپنی کامیابیاں بتائیں۔
آسٹریلوی وزیراعظم نے پہلے ایک کارڈ پیش کیا جس پر آسٹریلیا کی ایشز سیریز میں دو ایک کی برتری لکھا ہوا تھا، اس پر انگلش وزیراعظم بھی پیچھے نہ رہے اور رشی سوناک نے انگلینڈ کے مارک ووڈ اور کرس ووکس کی تیسرا ٹیسٹ جیتنے کے جشن منانے والی تصویر پیش کی۔
کینگرو وزیراعظم نے ہار نہیں مانی بلکہ انتھونی البنیز نے جانی بیئرسٹو کے متنازع آؤٹ کی تصویر رشی سوناک کو دکھادی۔اس موقع پر دونوں وزرائے اعظم کے درمیان دلچسپ جملوں کا تبادلہ بھی ہوا۔
اس موقع پر آسٹریلوی وزیراعظم انتھونی البنیز نے گراؤنڈ پر کریز کا نشان لگانے کا انداز اپناتے ہوئے کہا کہ میں آپ سے تھوڑا سا زیادہ متحرک ہوں، اس پر برطانوی وزیر اعظم نے کہا کہ معذرت میں اپنے ساتھ سینڈپیپر نہیں لایا۔
نیٹو سمٹ کے دوران ہونیوالی اس دلچسپ لڑائی کے بعد برطانوی وزیر اعظم نے آسٹریلیا کے 2018 کے بال ٹمپرنگ کیس کے حوالے سے بات کی جبکہ دونوں وزرائے اعظم نے جونی بیئرسٹو کے متنازع آؤٹ پر اپنی اپنی ٹیم کی حمایت کی۔