بھارت میں ٹماٹروں کی بڑھتی قیمت اور قلت کے باعث قدر میں اضافہ ہونے کے بعد کوبرا سانپ نے ٹماٹروں کی حفاظت کی ذمہ داری اٹھالی ہے۔
بھارت میں دو ماہ قبل ٹماٹر 20 روپے فی کلو میں دستیاب تھے لیکن اب 150 روپے تک پہنچ چکے ہیں۔سوشل میڈیا پر وائرل ویڈیو میں ایک خطرناک کنگ کوبرا سانپ ٹماٹروں کے قریب بیٹھا ہے جس سے ایسا محسوس ہوتا ہے کہ سانپ قیمتی ٹماٹروں کی حفاظت کر رہا ہے۔
یاد رہے کہ بھارت میں ٹماٹروں کی بڑھتی ہوئی قیمتوں کے باعث شہری شدید پریشان ہیں جہاں ٹماٹروں کی قیمت پیٹرول کی قیمت سے بھی تجاوز کر گئی ہے۔
بھارت میں ٹماٹر کی قیمتوں میں ایک ماہ کے دوران 288 فیصد کا اضافہ ہوگیا ہے۔ اترپردیش میں ایک شخص نے اس نایاب ٹماٹر کی حفاظت کے لیے باونسرز تعینات کیے تو پولیس نے نقص امن کے الزام کے تحت اس سمیت پانچ افراد کو گرفتار کرلیا۔
قیمتیں بڑھنے کی وجہ سے اس وقت بھارت میں ٹماٹر کچھ لوگوں کیلئے قیمتی تحفہ بن گئے ہیں، خاتون کو سالگرہ کے موقع پر رشتے داروں کی جانب سے ٹماٹروں کے تحائف دیئے گئے۔
بھارتی ریاست مہاراشٹرا کے ضلع تھانے میں خاتون کو رشتے داروں کی جانب سے سالگرہ کے موقع پر 4 کلو سے زیادہ ٹماٹروں کے تحائف دیئے گئے۔