مشہور میزبان ساحر لودھی نے حال ہی میں اپنے والدین کے ساتھ ماضی میں پیش آنے والے مشکل وقت کے بارے میں انکشاف کیا ہے جس دوران وہ جذباتی ہوگئے۔
اداکار و میزبان ساحر لودھی نے انکشاف کیا کہ جب وہ پیدا ہوئے تو اس کے بعد گھر کے معاشی حالات خراب ہوگئے تھے، اُنہوں نے اپنے والدین کومشکلات کے ساتھ زندگی گزارتے دیکھا ہے۔
ساحر لودھی نے بتایا کہ کہ اُن کی والدہ نے ایک پرانا قصہ یاد کرتے ہوئے اُنہیں ایک بار بتایا تھا کہ اُن کے پاس صرف دو جوڑے تھے جو پہن پہن کر کافی گھِس چکے تھے، وہ اپنے کپڑوں کو دوپٹے کی مدد سے چھپاتی تھیں۔
والدہ سے متعلق ساحر لودھی کا بتانا ہے کہ جب اُنہیں امریکا جانا تھا تو ٹکٹس کے لیے پیسے کم پڑ گئے تھے، تب ان کی والدہ نے اُنہیں اپنی باریک سی سونے کی چوڑیاں بیچنے کے لیے دی تھیں۔
انٹرویو کے دوران اُنہوں نے اپنے والد کا بھی مشکل وقت بتایا۔ ساحر کا کہنا تھا کہ اُن کے والد صرف خاندان کی کفالت کے لیے رات کی شفٹوں میں کام کیا کرتے تھے۔
ساحر نے انٹرویو کے دوران انکشاف کیا کہ آج اِن کے والد اِن کی کمپنی کے چیئرمین ہیں۔
ساحر لودھی کا مزید بتانا تھا کہ میں اور میرے سب ہی بہن بھائی اپنی اپنی ذمے داریوں سے اچھی طرح سے واقف ہیں، والد اور والدہ کی بڑھتی عمر میں اُن کی دیکھ بھال کے لیے سب اپنا کردار ادا کر رہے ہیں۔
ساحر لودھی اور ان کی بہن شائستہ لودھی آج میڈیا انڈسٹری کی جانی مانی شخصیات ہیں۔ دونوں نے کئی سال مارننگ شو کی میزبانی میں اپنے فرائض انجام دیے ہیں۔