بالی ووڈ کے دبنگ خان سلمان کے نئے ہیر اسٹائل کی دھوم سوشل میڈیا پر بھی مچ گئی، سلو بھائی کو نئے ہیئر اسٹائل میں دیکھ کر لوگوں نے عمر پر بھی سوال اٹھانا شروع کردیئے ہیں۔
بالی ووڈ کے فیشن آئیکون سلمان خان کا تیرے نام میں رادھے والا ہیر اسٹائل ہو یا پھر دبنگ فلم میں چل بل پانڈے کی مونچھیں، مداح ہر روپ میں سلمان خان کو بہت پسند کرتے ہیں۔دو روز قبل مداحوں نے سلمان خان کو ایک نئے ہیر اسٹائل میں دیکھا جس کی دھوم بھی مچی ہوئی ہے۔
اتوار کی رات سلمان خان ممبئی میں ایک پارٹی میں شرکت کیلئے پہنچے تو اداکار کو بظاہر گنجا دیکھا گیا، سلمان کے اس نئے ہیئر اسٹائل کی تصاویر اور ویڈیوز وائرل ہوئیں تو مداح تجسس میں پڑگئے۔
سوشل میڈیا پر کچھ صارفین نے سلمان کی نئی فلم میں ان کے کردار کے حوالے سے پیش گوئی کی تو کسی نے انہیں آرمی مین کہہ دیا، کچھ لوگوں کا کہنا تھا کہ عمر کی وجہ سے سلمان خان کے بال جھڑگئے ہیں۔
اس حوالے سے اطلاعات یہ ہیں کہ سلمان خان کرن جوہر کی اگلی ایکشن فلم میں آرمی افسر کا کردار ادا کریں گے گوکہ فلم کا نام اور مزید تفصیلات سامنے نہیں آئیں تاہم یہ معلوم ہوا ہے کہ فلم کی شوٹنگ رواں سال نومبر میں شروع ہوگی۔
بالی ووڈ ذرائع کا کہنا ہے کہ اگلی فلم میں فوجی افسر کا کردار نبھانے کے لیے سلمان خان نے خاص طور پر نیا ہیئر اسٹائل اپنا رکھا ہے۔