جو لوگ وقت کی قدر و قیمت جانتے ہیں وہ ہمیشہ اپنے وقت کا درست استعمال کرکے ہمیشہ آگے بڑھنے کی کوشش کرتے ہیں لیکن کچھ لوگ ہاتھ پر ہاتھ رکھ کر وقت بدلنے کا انتظار کرتے رہے ہیں۔
بھارت میں 8 سال کا بچہ تقریباً 3 گھنٹے بند لفٹ میں پھنسا رہا لیکن اس بچے نے وقت کو ضائع نہیں کیا بلکہ پرسکون رہ کر اپنا اسکول کا ہوم ورک مکمل کرلیا۔
بھارت کے شہر فرید آباد کی اومیکس ہائٹس سوسائٹی میں 8 سالہ بچہ گھر سے ٹیوشن کیلئے نکلا تو لفٹ میں پھنس گیا، خراب لفٹ 3 گھنٹے تک رکی رہی تاہم بچے نے لفٹ کا فون بھی بند ہونے کی وجہ سے شور شرابا کرنے یا پریشان ہونے کے بجائے اپنا ہوم ورک پورا کرنے پر توجہ دی۔
بچے کے ٹیوشن نہ پہنچنے کی وجہ سے جب ٹیچر نے گھر والوں سے رابطہ کیا تو بچے کے والد نے بیٹے کی تلاش شروع کردی۔ سوسائٹی کے گارڈ نے بتایا کہ لفٹ کام نہیں کررہی ممکن ہے بچہ اس میں موجود ہو، جس پر بچے کے باپ نے مکینک کو بلایا۔
مکینک کی کوششوں کے بعد 4 بجے سے لفٹ میں پھنسے گارویت کو بالآخر شام 7 بجے کے قریب نکالا گیا۔
بچے کے اہل خانہ کا کہنا ہے کہ لفٹ کے ذمہ دار لوگوں کے خلاف کارروائی کی جائے۔ ان کا کہنا ہے کہ لفٹ میں پہلے بھی مسائل کا سامنا رہا ہے۔