خلائی مشن چندریان تھری کے چاند پر کامیاب لینڈنگ کے بعد بھارتی سیاستدانوں کے دماغ بھی آسمان پر پہنچ گئے، چاند کو اپنی ملکیت قرار دینے کیلئے پارلیمنٹ میں قرار داد پیش کرنے کا مطالبہ کردیا گیا۔
چندریان 3 کی چاند پر لینڈنگ کے بعد آل انڈیا ہندو مہاسبھا کے صدر سوامی چکرپانی مہاراج نے وزیراعظم نریندرمودی حکومت سے چاند کو ’ہندو سناتن راشٹر‘ قرار دینے کا مطالبہ کردیا ہے۔
سوامی چکرپانی نے اپنے ایک ویڈیو پیغام میں حکومت سے مطالبہ کیا ہے کہ چندریان 3 کی چاند پر کامیاب لینڈنگ کے بعد دیگر مذاہب سے پہلے چاند کو ہندو جائیداد قرار دیا جائے۔
ویڈیو بیان میں سوامی چکرپانی نے کہا کہ اس سے پہلے کہ کوئی دوسرا مذہب وہاں پہنچے اور چاند کی ملکیت کا دعوی کرے، حکومت کوچاند کو ہندو راشٹر اور چندریان 3 لینڈنگ سائٹ کو دارالحکومت قرار دیا جانا چاہئے، پارلیمنٹ اس حوالے سے قرارداد منظور کرے۔
گزشتہ ہفتے بھارتی خلائی مشن چندریان 3 نے چاند کے جنوبی قطب پر تاریخی لینڈنگ کی تھی جس کے بعد بھارتی وزیر اعظم نریندر مودی نے کہا تھا کہ جس مقام پر لینڈر نے چھوا ہے اسے شیو شکتی پوائنٹ کے نام سے جانا جائے گا۔