امریکا میں جیل میں قید خطرناک قیدی کے جیل سے نکلنے کے ڈرامائی انداز کی ویڈیو سوشل میڈیا پر وائرل ہوگئی۔
امریکا کی چیسٹر کاؤنٹی میں انتہائی خطرناک قرار دیا جانے والا قیدی انتظامیہ کی آنکھوں میں دھول جھونک کر جیل سے باآسانی فرار ہوگیا۔
34 سالہ ڈینیلو سوزا کیولکانٹی اپنی سابقہ گرل فرینڈ کو قتل کرنے کے جرم میں عمر قید کی سزا کاٹ رہا تھا۔چیسٹر کاؤنٹی پولیس نے ایک سی سی ٹی وی فوٹیج جاری کی جس میں قیدی کے فرار کا منظر دکھایا گیا۔
سیکورٹی حکام کی لاپرواہی کا فائدہ اٹھاتے ہوئے مجرم دو دیواروں کے پاس گیا اور آسانی اور مہارت کے ساتھ ان پر چڑھ گیا۔ مفرور مجرم کو بوکوبسن قصبے کے دو میل کے دائرے میں کم از کم چار بار دیکھا گیا ہے۔
پنسلوانیا پولیس کا کہنا ہے کہ قیدی کی گرفتاری کیلئے ہر ممکن کوشش کرتے ہوئے جدید ٹیکنالوجی سے بھی مدد لے رہے ہیں، مقامی پولیس نے رہائشیوں کی 100 سے زیادہ رپورٹوں کا حوالہ دیا تاہم ابھی تک اسے پکڑا نہیں جاسکا۔