بالی ووڈ کی مشہور کامیڈی فلم کے دو پہلے پارٹس میں اُدے بھائی کاکردار ادا کرنے والے سینئر اداکار نانا پاٹیکر نے ویلکم کے تیسرے پارٹ سے نکالے جانے پر شدید تنقید کی ہے۔
نانا پاٹیکر نے اپنی نئی فلم ویکسین وار کے ٹریلر لاؤنچ کے موقع پر ویلکم 3 سے متعلق بات کرتے ہوئے کہا کہ شاید میں بہت بوڑھا ہوگیا ہوں تبھی انہوں نے مجھے ویلکم 3 کے لیے کاسٹ نہیں کیا۔
انہوں نے کہا کہ فلم ویلکم تھری کے پروڈیوسرز پر تنقید کرتے ہوئے کہا کہ شاید دا ویکسین وار کے فلم سازوں کو ایسا نہیں لگتا کہ میں بوڑھا ہوگیا ہوں، اس لیے انہوں نے مجھے فلم کے لیے کاسٹ کرلیا ہے۔
یاد رہے کہ ویلکم کے دونوں پارٹس میں ناناپاٹیکر کی جانب سے نبھایا گیا اُدے بھائی کا کردار مداحوں کو خوب پسند آیا تھا اور آج بھی فلم کے اسٹلز یا چند سیکنڈز کے کلپس سوشل میڈیا میمز میں استعمال کیے جاتے ہیں۔
ویلکم 3 کا نام ویلکم ٹو دا جنگل رکھاگیا ہے ، اس حوالے سے فلم سازوں کی جانب سے بتایا گیا ہے کہ اب فلم میں نانا پاٹیکر اور انیل کپور نظر نہیں آئیں گے بلکہ انکی جگہ پر منا بھائی ایم بی بی ایس کی جوڑی سنجے دت اور ارشد وارثی مرکزی کردار ادا کرینگے۔