کراچی میں اسٹریٹ کرائمز کی شرح روز بروز بڑھتی جارہی ہے، شہر کا کوئی علاقہ ڈاکوؤں سے محفوظ نہیں ہے اور اب ڈاکوؤں نے فوڈ رائیڈرز جیسا ہیلمٹ و ماسک پہن کر لوگوں کو لوٹنا شروع کردیا ہے۔
پولیس سے ملنے والی اطلاعات کے مطابق ڈاکوپولیس سے بچنے کے لیے نئے بہروپ اختیار کررہے ہیں، پولیس کے مطابق کئی وارداتوں کی تفتیش میں پتا چلا ہے کہ بیشتر ملزمان فوڈ رائیڈرز کے بیگ اٹھائے ہوتے ہیں۔
گلشن جمال میں سی سی ٹی وی فوٹیج میں یہ بھی دیکھا گیا ہے کہ گھروں کے باہر کھڑی گاڑیوں کے شیشے توڑ کر سامان چوری کرنے میں بھی فوڈ ڈلیوری بوائے ملوث پائے گئے،ملزمان اسی بھیس میں گاڑیوں کی بیٹریاں بھی چوری کر لیتے ہیں۔
کراچی میں ہونیوالی کئی وارداتوں میں ملزمان خواتین کو ساتھ رکھتے ہیں کیونکہ خاتون کے ساتھ ہونے پر فیملی سمجھ کر نہیں روکا جاتا۔ملیر میں ایسے وارداتیوں کو بھی دیکھا گیا ہے جو اسکول کے بیگ لٹکائے بچوں کو ساتھ رکھتے ہیں۔
پولیس کا کہنا ہے کہ بیشتر ملزمان وارداتوں کے دوران سی سی ٹی وی فوٹیجز سے بچنے کے لیے ہیلمٹ ہر صورت پہنتے ہیں اور ماسک بھی لگا لیتے ہیں۔فوڈ رائیڈرز کو چونکہ عام طور پر چیکنگ کے دوران پولیس نہیں روکتی اس لیے وارداتوں کے بعد وہ با آسانی فرار ہو جاتے ہیں۔