بجلی کمپنی کے سرکاری افسران کے لیے اچھی خبر سامنے آئی ہے۔
بجلی کمپنیوں کے افسران کو مفت بجلی فراہم کرنے کے بجائے اب رقم دینے کے معاملے پر کابینہ کی توانائی کمیٹی نے اہم اجلاس طلب کرلیا۔
رپورٹس کے مطابق پاور ڈویژن کے گریڈ 17 سے 22 کے افسران کو مفت یونٹس کے بجائے رقم دینے کی سمری جاری کی جائے گی۔
ذرائع کے مطابق بجلی کمپنی کے 17 گریڈ کے افسران کو مفت یونٹس کے بجائے ماہانہ 15 ہزار 858 روپے اور گریڈ 18 کے افسر کو 21 ہزار 996 روپے دینے کی تجویز ہے۔
ذرائع کا کہنا ہے کہ گریڈ 19کے افسر کو ماہانہ 37 ہزار 594، گریڈ 20 کے افسر کو 1100 یونٹس کے بجائے 46 ہزار 992 اور گریڈ 21 کے افسر کو مفت یونٹس کے بجائے ماہانہ 55 ہزار 536 روپے دینے کی تجویز ہے۔
ذرائع کے مطابق جنکوز کے گریڈ 17 کے افسر کو ماہانہ 24 ہزار 570 روپے، گریڈ 18 کے افسر کو ماہانہ 700 یونٹس کے بجائے 26 ہزار 460 روپے دینے کی تجویز پر غور کیا جائے گا۔
گریڈ 19 کے افسر کو ماہانہ مفت یونٹس کے بجائے 42 ہزار 720 روپے دینے کی تجویز ہے جبکہ گریڈ 20 کے افسر کو ماہانہ یونٹس کے بجائے 46 ہزار 992 اور جنکوز کے گریڈ 21 کے افسر کو ماہانہ 55 ہزار 536 روپے دینے کی سفارش کی گئی ہے۔