پیغام رسانی کی مقبول سوشل میڈیا ایپلیکیشن واٹس ایپ میں آئے روز نئی تبدیلیاں دیکھنے کو ملتی ہیں اور کوشش کی جاتی ہے کہ صارفین کوواٹس ایپ پر ہر آسان سہولت مل سکے۔
وہیں اس ایپ کی جانب سے ایک اور فیچر متعارف کرا دیا گیا ہے جس میں صارفین تاریخ کے حساب سے میسج ڈھونڈ سکیں گے۔
یعنی فیچر کو استعمال کرتے ہوئے صارفین مخصوص تاریخ پر بھیجا گیا میسج باآسانی ڈھونڈ سکیں گے۔
واٹس ایپ بِیٹا انفو کی ایک رپورٹ میں پیش کیے جانے والے ایک اسکرین شاٹ میں دیکھا جا سکتا ہے کہ چیٹ میں پیغامات ڈھونڈنے کے لیے ایک کلینڈر کا بٹن موجود ہے جس کو استعمال کرتے ہوئے صارفین کسی مخصوص تاریخ کو بھیجا گیا پیغام فوراً ڈھونڈ سکیں گے۔
رپورٹ کےمطابق اس فیچر کی مدد سے چیٹ میں پچھلی تاریخوں میں جا کر پیغام نکالنا نہ صرف وقت بچائے گا بلکہ صارفین کی پریشانی بھی کم کرے گا۔
اس کے علاوہ مزید یہ بتایا گیاہے کہ فیچر تحریری پیغامات کے بجائے وائس نوٹ جیسے غیر تحریری پیغامات کو ڈھونڈنے میں مدد گار ثابت ہوگا کیوں کہ وائس نوٹ میں کوئی تحریر نہیں ہوتی اور تحریری پیغامات کو لکھ کر ہی ڈھونڈا جاسکتا ہے۔
واضح رہے کمپنی کی جانب سے یہ آزمائشی فیچر ان بِیٹا صارفین کے لیے دستیاب کیا گیاہے جو واٹس ایپ ویب کے آفیشل بِیٹا پروگرام میں حال ہی میں شامل ہوئے ہیں۔ لیکن توقع کی جارہی ہے کہ جلد ہی دیگر صارفین کے لیے بھی یہ فیچر متعارف کرا دیا جائے۔