انڈیا میں ہونے والے ورلڈ کپ میں ٹیم کی ناقص کارکردگی کے بعد پاکستان کے کپتان بابر اعظم تینوں فارمیٹس کی کپتانی سے مستعفی ہو گئے ہیں۔
انڈیا میں ہونے والے ورلڈ کپ میں ٹیم کی ناقص کارکردگی کے بعد پاکستان کے کپتان بابر اعظم تینوں فارمیٹس کی کپتانی سے مستعفی ہو گئے ہیں۔
بابر اعظم کی جانب سے یہ اعلان ورلڈ کپ میں پاکستن کی انگلینڈ سے شکست کے صرف چار روز بعد کیا گیا ہے۔ خیال رہے کہ بابراعظم 12 تاریخ کو بذریعہ پرواز انڈیا سے لاہور پہنچے تھے۔
بابر اعظم نے یہ اعلان سوشل میڈیا پلیٹ فارم ایکس (سابقہ ٹوئٹر) پر ایک بیان پوست کرتے ہوئے کیا ہے۔ گذشتہ چار برس سے پاکستان کی کپتانی کے فرائض نبھانے والے بابر اعظم نے بطور کپتان 20 ٹیسٹ میچوں، 43 ون ڈے میچوں اور 71 ٹی ٹوئنٹی میچوں میں پاکستان کی نمائندگی کی۔
https://twitter.com/babarazam258/status/1724780099101233253
بابر اعظم کے مستعفی ہونے کے بعد شان مسعود کو ٹیسٹ جبکہ شاہین آفریدی کو ٹی ٹوئنٹی کا کپتان مقرر کر دیا گیا۔ پاکستان نے تاحال ون ڈے ٹیم کا کپتان مقرر نہیں کیا ہے جس کی ایک وجہ یہ ہے کہ پاکستان کے اب سے ایک سال تک ون ڈے انٹرنیشنل شیڈول کا حصہ نہیں ہے۔
بابر اعظم نے اپنے بیان میں لکھا کہ ’مجھے وہ لمحہ ٹھیک سے یاد ہے جب مجھے سنہ 2019 میں پاکستان کرکٹ بورڈ کی جانب سے کپتانی کرنے کی آفر کے لیے کال موصول ہوئی تھی۔ گذشتہ چار سالوں کے دوران میں نے گراؤنڈ میں اور اس سے باہر متعدد مرتبہ اتار چڑھاؤ دیکھا ہے لیکن میں نے مستعدی اور پورے دل کے ساتھ دنیا میں پاکستان کی عزت اور عظمت برقرار رکھنے کی کوشش کی ہے۔
انھوں نے مزید کہا کہ ’وائٹ بال فارمیٹ میں پاکستان کو سرِفہرست لانے میں کھلاڑیوں، کوچز اور مینجمینٹ کی مشترکہ کوششیں شامل تھیں لیکن میں اس دوران پاکستان کے پرجوش کرکٹ فینز کا تہہِ دل سے شکر گزار ہوں جنھوں نے اس سفر کے دوران اپنی غیرمتزلزل حمایت جاری رکھی۔
’آج میں بطور کپتان پاکستان ٹیم تینوں فارمیٹس سے مستعفی ہو رہا ہوں۔ یہ ایک مشکل فیصلہ ہے لیکن میرے خیال میں یہی اس فیصلے کا صحیح وقت ہے۔ میں تینوں فارمیٹس میں پاکستان کی نمائندگی کرتا رہوں گا۔ میں نئے کپتان اور ٹیم کی اپنے تجربے اور لگن سے مکمل حمایت کرنے کے لیے تیار ہوں۔‘
https://twitter.com/TheRealPCB/status/1724803319087178155?t=fCxVA99wO8RMdhQnF8olJg&s=08
بابر اعظم کی ورلڈ کپ 2023 میں بطور کپتان اور بلے باز کارکردگی ان کے معیار کے اعتبار سے خاصی مایوس کن رہی۔ انھوں نے نو میچوں میں 320 رنز بنائے اور اننگز کے اہم موقعوں پر آؤٹ ہوتے رہے۔
خیال رہے کہ بابر اعظم کی کپتانی کے بارے میں اس سال کے آغاز سے ہی قیاس آرائیاں چل رہی تھیں۔ گذشتہ سال پاکستان کو ہوم سیریز میں آسٹریلیا سے ایک صفر جبکہ انگلینڈ سے تین صفر سے شکست کا سامنا کرنا پڑا تھا۔
اس کے علاوہ پاکستان اس وقت جاری ون ڈے ورلڈ کپ کی لیگ سٹیج سے باہر ہو چکا ہے جبکہ اس سے قبل سنہ بالترتیب 2021 اور 22 کے ٹی ٹوئنٹی ورلڈ کپ سیمی فائنل اور فائنل ہارا تھا۔
https://twitter.com/iMRizwanPak/status/1724795302786560008?t=6mWcpMvnC00_kKKCcWs9VA&s=08
پاکستان کی ٹی ٹوئنٹی اور ون ڈے ٹیمیں دونوں ہی آئی سی سی ورن ڈے رینکنگ میں سرِ فہرست رہی ہیں تاہم بابر پرفیصلہ کن موقعوں پر غیریقینی کا شکار ہونے پر تنقید کی جاتی رہی ہے۔
بابر کو ایک قدامت پسند کپتان کے طور پر یاد کیا جائے گا جو اپنے بلے سے بطور کپتان اچھی کارکردگی دکھاتے رہے لیکن فیصلہ کن موقعوں پر جارحانہ انداز اپنانے میں ناکام رہے۔
بابر اعظم جب کپتان تھے تو ان کی بیٹنگ کی اوسط بہترین رہی ہے۔ ٹیسٹ میچوں میں انھوں نے 50 کی اوسط سے 1727 رنز بنائے، ون ڈے میں بطور کپتان 60 کی اوسط سے 2370 رنز بنائے جبکہ ٹی ٹوئنٹی میچوں میں بطور کپتان 71 میچوں میں بابر نے 37 کی اوسط سے 2195 رنز بنائے۔
ان کی جانب سے مستعفی ہونے کے فیصلے پر سابق کرکٹرز اور ان کی مداحوں کی جانب سے ٹوئٹر پر پیغامات شیئر کیے جا رہے ہیں۔ اس کے علاوہ پی سی بی کی جانب سے کپتان بابر اعظم کو الوداع کہنے سے پہلے ہی اپنے سوشل میڈیا اکاؤنٹ سے نئے کپتانوں کے ناموں کا اعلان کیا گیا ہے جس پر صارفین پی سی بی پر تنقید کر رہے ہیں۔
ایک صارف نے لکھا کہ ’میرا خیال تھا کہ آپ کو پرانے کپتان کو الوداع کہنے سے پہلے نئے کپتانوں کی آمد کا جشن نہیں منانا چاہیے تھا۔‘
پاکستان کے وائٹ بال کے وکٹ کیپر محمد رضوان نے لکھا کہ ’کپتان، آپ دلوں کے کپتان ہو اور پاکستان کی تاریخ کے سب سے بڑے بیٹر۔‘
https://twitter.com/iMRizwanPak/status/1724795302786560008
اس ٹیم کی شان اور عزت کے ساتھ قیادت کرنے کے لیے کپتان آپ کا شکریہ۔ آپ آج تک پاکستان کرکٹ ٹیم کے کے لیے ایک بہترین تحفہ ثابت ہوئے ہیں۔ جس طرح سے آپ نے شدید تنقید کے باوجود کھلاڑیوں کی حمایت کی ہے وہ آپ کے کردار اور یقین کے بارے میں واضح کرتا ہے۔
آپ ملک کے لیے رنز کے پہاڑ کھڑے کرتے رہیں۔
آپ چیمپئن ہیں بابر اعظم!!
https://twitter.com/ImJaveria/status/1724799779681759512?t=VT59qFSPyB6aJHGw82Kvsw&s=08
پاکستان کے فاسٹ بولر اور ٹی ٹوئنٹی فارمیٹ کے کپتان شاہین شاہ آفریدی نے بابر اعظم کے لیے لکھا کہ ’بابر اعظم آپ کی مثالی قیادت میں، حقیقی ٹیم ورک اور دوستی کا مشاہدہ کرنا ایک اعزاز کی بات ہے۔ آپ کی قائدانہ صلاحیت اور ٹیم کے اتحاد اور اجتماعی کامیابی کا عزم قابل تحسین ہے۔
آپ کی جانب سے بیٹنگ کے مزید ریکارڈ توڑنے کا منتظر ہوں۔ ان شاء اللہ۔‘
https://twitter.com/iShaheenAfridi/status/1724808810181853251?t=KgGWHFlZ9S8J8iRMEJ3Qgw&s=08
