اسلام آباد۔23دسمبر (اے پی پی):برسلز میں پاکستانی سفارت خانہ میں مسیحی برادری کے ساتھ کرسمس کی خصوصی تقریب کا اہتمام کیا گیا، پاکستانی سفیر آمنہ بلوچ نے مسیحی برادری کو کرسمس کی مبارکباد دیتے ہوئے بین المذاہب ہم آہنگی اور روایات میں مسیحی برادری کے کردار کو اجاگر کیا۔
ہفتہ کو یہاں موصولہ پریس ریلیز کے مطابق 23 دسمبر 2023 کوپاکستانی سفارتخانہ میں مسیحی برادری کے ساتھ مل کر کرسمس کے خصوصی موقع کو بھرپور طریقے سے منانے کے لیے ظہرانے کا اہتمام کیا گیا۔ برسلز میں پاکستانی سفیر آمنہ بلوچ نے اپنے خیر مقدمی کلمات میں کہا کہ مسیحی کمیونٹی کا قومی پرچم کی سربلندی کے لئے اہم کردار ہے اور وہ پاکستان میں بین المذاہب ہم آہنگی اور بین المذاہب روایات کی عکاسی کرتی ہے۔سفارت خانے میں منعقدہ کرسمس کی رنگا رنگ تقریب میں ایک کرسمس ٹری بھی سجایا گیا ۔ اس موقع پر مسیحی مذہبی گیت بھی پیش کئے گئے جبکہ پادری سلیم نجم، پادری جان اشرف اور پادری ارشد کھوکھر نے محفوظ اور ایسی پرامن دنیا کے لیے خصوصی دعائیں کیں جس میں تمام انسانیت ہم آہنگی کے ساتھ رہ سکے۔ مہمانوں کی روایتی پاکستانی کھانوں اور کرسمس کے پکوان سے تواضع کی گئی۔بچوں نے خاص طور پر سانٹا کلاز سے تحائف اور چاکلیٹس لئے اور اس موقع سے بھرپور لطف اٹھایا۔ تقریب کے اختتام پرکرسمس کیک بھی کاٹا گیا اور نیک تمنائوں و مبارکبادوں کا تبادلہ کرتے ہوئے چہروں پر مسکراہٹیں بکھیری گئیں۔اس تقریب میں ‘پرامن اور جامع پاکستان’ کو اجاگر کیا گیا۔