اسلام آباد ۔24دسمبر (اے پی پی):فیڈرل گورنمنٹ ایمپلائیز ہاؤسنگ اتھارٹی (ایف جی ای ایچ اے)نے جڑواں شہروں سمیت ملک کے آٹھ بڑے شہروں میں نئے رہائشی منصوبوں پر پیش رفت شروع کردی ،اتھارٹی کو میگا منصوبوں میں دلچسپی رکھنے والے زمین مالکان، کمپنیوں اورمختلف فرمز کی جانب سےمتعدد درخواستیں موصول ہوچکی ہیں۔ ایف جی ای ایچ اے کے ذرائع نے اے پی پی کو بتایا کہ ملک کے بڑے شہروں میں ہاؤسنگ اسکیموں ،پلاٹس، مکانات اور اپارٹمنٹس)کے متعدد منصوبوں کے لئے زمین کی فراہمی کے لئےدرخواستیں طلب کی گئی تھیں۔
انہوں نے بتایا کہ درخواستوں اور انتخاب کے طریقہ کار پر جوائنٹ وینچر ریگولیشنز 2020 کے مطابق عمل کیا جارہا ہے۔ انہوں نے کہا کہ اتھارٹی جڑواں شہروں راولپنڈی اور اسلام آباد سمیت ملک کے آٹھ بڑے شہروں میں نئے رہائشی منصوبے شروع کرنے کی منصوبہ بندی کر رہی ہے، دیگر شہروں میں لاہور، پشاور، کوئٹہ، ملتان، فیصل آباد اور کراچی شامل ہیں۔ انہوں نے مزید کہا کہ نئے ہاؤسنگ منصوبے وفاقی حکومت کے ملازمین اور عام لوگوں کے لئے مشترکہ منصوبے کی بنیاد پر شروع کیے جائیں گے۔ایک سوال کے جواب میں انہوں نے کہا کہ گرین انکلیو ٹو منصوبے کے پہلے حصے کے ترقیاتی کام تیزی سے جاری ہیں ، ایف جی ای ایچ اے سرکاری ملازمین کے گرین انکلیو ٹو رہائشی منصوبے کا ترقیاتی کام 2025 تک مکمل کر لے گا، ہاؤسنگ اتھارٹی گرین انکلیو ٹو پروجیکٹ وزارت ہاؤسنگ اینڈ کنسٹرکشن کے ماتحت ادارے ایف جی ای ایچ اے کا اسکائی گارڈن کے ساتھ مشترکہ منصوبہ ہے جس کا مقصد سرکاری ملازمین کو کم قیمت پلاٹ/ فلیٹس فراہم کرنا ہے۔