اسلام آباد۔30دسمبر (اے پی پی):نگران وفاقی وزیر اطلاعات، نشریات و پارلیمانی امور مرتضیٰ سولنگی نے سینئر حریت رہنما پروفیسر نذیر احمد شال کے انتقال پر گہرے دکھ اور افسوس کا اظہار کرتے ہوئے کہا ہے کہ پروفیسر نذیر احمد شال کے انتقال کی خبر سن کر دلی افسوس ہوا، مرحوم ایک باہمت نڈر اور مخلص رہنما تھے، ان کے انتقال سے کشمیر ایک عظیم رہنما سے محروم ہو گیا ہے۔
ہفتہ کو اپنے تعزیتی بیان میں وفاقی وزیر اطلاعات نے کہا کہ پروفیسر نذیر احمد شال مقبوضہ کشمیر کے عوام کی ایک مضبوط آواز تھے، مرحوم نے مسئلہ کشمیر کو عالمی سطح پر اجاگر کرنے میں اہم کردار ادا کیا۔ انہوں نے کہا کہ پروفیسر نذیر احمد شال کی کشمیری عوام کے ناقابل تنسیخ حق خودارادیت کے حصول کی جدوجہد کے لئے سیاسی اور سفارتی خدمات کو ہمیشہ یاد رکھا جائے گا۔ انہوں نے دعا کی کہ اللہ تعالیٰ مرحوم کے درجات بلند اور لواحقین کو صبر جمیل عطا فرمائے۔ آمین