بالی ووڈ کنگ شاہ رخ خان ناصرف بھارت بلکہ پاکستان سمیت پوری دنیا میں اپنے رومانوی کردار کی وجہ سے ایک منفرد پہچان رکھتے ہیں، کیریئر کے آغاز میں کچھ منفی کرداروں کے بعد دوبارہ نیگٹو رول ادا نہ کرنے کے بارے میں شاہ رخ خان نے اہم انکشافات کئے ہیں۔
اداکار شاہ رخ خان ’ڈر‘، ’بازی گر‘ اور ’انجام‘جیسی فلموں میں اپنے منفی کرداروں کے لیے بھی جانے جاتے ہیں تاہم اس کے بعد سے وہ منفی کرداروں سے دور رہے۔
’انڈین آف دی ایئر 2023ء ‘قرار دیے جانے پر ایوارڈ کی تقریب میں خیالات کا اظہار کرتے ہوئے شاہ رخ خان نے کہا کہ میں ایک ایسا انسان ہوں جو پُر امید ہے اور خوشیوں بھری کہانیاں سناتا ہے یہی وجہ ہے کہ میں فلموں میں زیادہ تر ایسے کردار ادا کرتا نظر آتا ہوں جو زندگی کے بارے میں مثبت نظریہ رکھتے ہیں، ۔
شاہ رخ خان نے فلموں میں منفی کردار ادا نہ کرنے کے بارے میں کہا کہ اگر میں فلم میں کسی برے آدمی یعنی کوئی منفی کردار ادا کرتا ہوں تو میں اس بات کو یقینی بناتا ہوں کہ اسے آخر میں بہت زیادہ تکلیف میں دکھایا جائے اور اسے کتے کی موت مارا جائے کیونکہ میرا یقین ہے کہ ہمیں ہماری اچھائی کا جواب ہمیشہ اچھائی میں ملتا ہے۔
2نومبر 1965کو پیدا ہونے والے شاہ رخ خان ہندی فلموں کے سپر اسٹار ہیں، اکثر میڈیا میں انھیں "بالی وڈ کا بادشاہ"، "کنگ خان" اور "رومانس کنگ" ناموں سے بھی پکارا جاتا ہے۔ شاہ رخ خان نے درجنوں فلموں میں اداکاری کی اور آج بھی وہ بالی ووڈ کے سب سے مقبول اداکار ہیں۔