پاکستانی شوبز صنعت کے معروف اداکار حمزہ علی عباسی کی جانب سے پہلے بھی فلموں میں آئٹم نمبر سانگ کرنے پر مخالفت کی گئی تھی اور دوبارہ ان کی طرف سے ایک بار پھر آئٹم نمبر کی مخالفت سامنے آئی ہے جس کی ویڈیو وائرل ہو رہی ہے۔
حال ہی میں حمزہ علی عباسی نے ویب چینل کے پوڈ کاسٹ پر انٹرویو دیا جس کا ویڈیو کلپ وائرل ہو رہا ہے۔ اداکار نے ساتھی فنکاروں کے ہمراہ عام گانے اور آئٹم نمبر پر کھل کر بات کی۔
مذکورہ وائرل کلپ میں میزبان اداکار سے آئٹم نمبر کے حوالے سے سوال کرتے ہیں، جس پر حمزہ علی عباسی نے کہا کہ میں آئٹم نمبرز کے حق میں نہیں ہوں، ایسے گانے جنسی طور پر اشتعال دلانے یا جنسی خواہشات کو بیدار کرنے والی شاعری اور مناظر پر مبنی ہوتے ہیں۔
انہوں نے مزید وضاحت دیتے ہوئے کہا کہ وہ گانے جس میں صرف رقص دکھایا جائے اور کوئی نیم عریاں اور بولڈ منظر نہ ہوں وہ عام گانے کہلاتے ہیں جن کی وہ کبھی مخالفت نہیں کرتے لیکن وہ آئٹم نمبر گانوں کی حمایت کبھی نہیں کریں گے جو بیہودہ شاعری اور مناظر پر مبنی ہو۔
اس موقع پر حمزہ علی عباسی کے ساتھ اداکارہ ہانیہ عامر بھی موجود تھی اور انہوں نے بھی ساتھی فنکار کی بات سے اتفاق کیا اور کہا کہ ان مسائل پر کھل کر بات ہونے کی ضرورت ہے تاکہ فلمز میں بہتری لائے جائے۔