کرغزستان میں حالات معمول پر، کسی پاکستانی کی ہلاکت نہیں ہوئی: وزیر خارجہ

پاکستان کے نائب وزیراعظم و وزیر خارجہ اسحاق ڈار کا کہنا ہے کہ ’بشکیک کے وزیر خارجہ نے درخواست کی ہے کہ ہم پر اعتماد کریں۔ کرغز حکومت کی درخواست پر دورہ نہ کرنے کا فیصلہ کیا ہے۔‘

اتوار کو لاہور میں نیوز کانفرنس کرتے ہوئے نائب وزیراعظم اسحاق ڈار نے کہا کہ بشکیک میں پیش آنے والا واقعہ ہمارے لیے بہت افسوسناک ہے۔ وزیراعظم شہباز شریف خود اس معاملے کو دیکھ رہے ہیں، میری خود بشکیک کے وزیر خارجہ سے تفصیلی بات ہوئی ہے۔‘انہوں نے بتایا کہ ’آج ایئرفورس کی ایک فلائٹ طلبا کو لینے بشکیک جائے گی۔ تین کمرشل پروازوں سے مزید 540 طلبا پاکستان آ سکیں گے۔

اسحاق ڈار نے کہا کہ سوشل میڈیا پر واقعے سے متعلق جھوٹی خبریں پھیلائی جا رہی ہیں۔ ’فقط پاکستانی طلبا نہیں بلکہ دیگر ممالک کے طلبا کو بھی نشانہ بنایا گیا۔‘

انہوں نے بتایا کہ ’بشکیک کے وزیر خارجہ نے یقین دہانی کرائی ہے کہ جمعے کے بعد سے یہاں امن قائم ہے، سکیورٹی ادارے پوری طرح متحرک ہیں۔‘

نائب وزیراعظم نے بتایا کہ ’بشکیک کے وزیر خارجہ کا کہنا ہے کہ یہ واقعہ غلط فہمی کی بنیاد پر ہوا۔ کوئی پاکستانی طالب علم ہلاک نہیں ہوا مجموعی طور پر 16 طلبا زخمی ہوئے ہیں۔‘

اسحاق ڈار کا مزید کہنا تھا کہ بشکیک واقعے میں چار سے پانچ پاکستانی زخمی ہوئے جو زیرِ علاج ہیں۔ گذشتہ روز 130 پاکستانی طلبا واپس آگئے ہیں، 50 سے زائد  نے پاکستانی سفارتخانے میں اپنی انٹری کروائی ہے۔‘