پیرس۔31مئی (اے پی پی):بیلاروس کی ٹینس کھلاڑی اور میگا ایونٹ کی سیکنڈ سیڈڈ آریاناسبالینکا، قزاخستان کی ٹینس کھلاڑی ایلینا ریباکینا،امریکی ٹینس سٹار میڈیسن کیز اور بیلجیئم کی ٹینس کھلاڑی ایلیس مرٹینز نے فرنچ اوپن ٹینس کے خواتین کے سنگلز مقابلوں کے تیسرے رائونڈ میں جگہ بنالی جبکہ بیلاروس کی ٹینس کھلاڑی وکٹوریہ آزارینکا ، روس کی اناستاسیاپائولیچنکووا اور اٹلی کی سیرا ایرانی میگا ایونٹ کے دوسرے رائونڈ میں ہار کر باہر ہوگئیں۔ سال کے دوسرے گرینڈ سلام فرنچ اوپن کے دلچسپ مقابلوں کا آغاز فرانس کے دارلحکومت پیرس میں ہو چکا ہے،جس میں شائقین ٹینس کو انتہائی دلچسپ اور کانٹے دار مقابلے دیکھنے کو مل رہے ہیں۔
میگا ایونٹ کے ویمن سنگلز مقابلوں کے دوسرے رائونڈ میں بیلا روس کی ا ٓریاناسبالینکانے عمدہ کھیل پیش کرتے ہوئے جاپان کی حریف کھلاڑی مویوکا اچیجیماکو سٹریٹ سیٹس میں 2-6 اور 2-6 سے شکست دے کر میگا ایونٹ کے تیسرے رائونڈ میں جگہ بنائی ، قزاخستان کی ٹینس کھلاڑی ایلینا ریباکینا نے بھی دوسری رکاوٹ عبور کر لی ،انہوں نے نیدرلینڈز کی حریف کھلاڑی آرانتکسا رش کو سٹریٹ سیٹس میں 3-6 اور4-6 سے ہرا کر ایونٹ سے باہر کر دیا۔ ایک اور میچ میں امریکی ٹینس کھلاڑی میڈیسن کیز نے حریف مصر کی مایار شریف احمد عبدالعزیز کو ٹائی بریک پر سٹریٹ سیٹس میں 0-6 اور 6-7(7-9) سے ہرا کر تیسرے رائونڈ کے لئے کوالیفائی کرلیا۔