پیرس۔5جون (اے پی پی):پولینڈ کی نامور ٹینس سٹار ،عالمی نمبر ون،دفاعی چیمپئن اور ایونٹ کی ٹاپ سیڈڈ آئیگا نتالیہ سویٹیک اور امریکا کی ٹینس سٹار کوکوگف فرنچ اوپن ٹینس کے خواتین کے سنگلز مقابلوں کے سیمی فائنل میں پہنچ گئیں جبکہ تیونس کی ٹینس کھلاڑی اونس جبیر اور جمہوریہ چیک کی ٹینس کھلاڑی مارکیٹا سمکووا میگا ایونٹ کے کوارٹر فائنل رائونڈ میں ہار کر باہر ہوگئیں۔
سال کے دوسرے گرینڈ سلام فرنچ اوپن کے دلچسپ مقابلوں کا سلسلہ فرانس کے دارلحکومت پیرس میں جاری ہےجس میں شائقین ٹینس کو انتہائی دلچسپ اور کانٹے دار مقابلے دیکھنے کو مل رہے ہیں۔ میگا ایونٹ کے ویمن سنگلز مقابلوں کے پہلے کوارٹر فائنل میچ میں پولینڈ کی آئیگا نتالیہ سویٹیک نے انتہائی شاندار کارکردگی کا مظاہرہ کرتے ہوئے حریف جمہوریہ چیک کی ٹینس کھلاڑی مارکیٹا سمکووا کو با آسانی سٹریٹ سیٹس میں شکست دے کر ٹاپ فور رائونڈ کے لئے کوالیفائی کرلیا۔دفاعی چیمپئن اور ایونٹ کی ٹاپ سیڈڈ آئیگا نتالیہ سویٹیک کی فتح کا سکور 0-6 اور 2-6 تھا۔ امریکا کی ٹینس سٹار اور میگا ایونٹ کی تھرڈ سیڈڈ کوکوگف نے بھی کوارٹر فائنل رکاوٹ عبور کر لی ، انہوں نے شاندار کارکردگی کا مظاہرہ کرتے ہوئے تیونس کی ٹینس کھلاڑی اونس جبیر کو 6-4، 2-6 اور 3-6 سے ہرا کر ایونٹ سے باہر کر دیا۔ سیمی فائنل رائونڈ میں پولینڈ کی آئیگا نتالیہ سویٹیک کا مقابلہ امریکی ٹینس سٹار کوکو گف سے ہوگا۔