نیویارک۔5جون (اے پی پی):انٹرنیشنل کرکٹ کونسل کے زیر اہتمام آئی سی سی مینز ٹی 20 ورلڈ کپ میں کل(جمعرات کو ) مزید تین میچوں کا فیصلہ ہوگا۔پہلا میچ گروپ بی کی ٹیموں آسٹریلیا اور اومان کے درمیان کینسنگٹن اوول، برج ٹاؤن، بارباڈوس میں کھیلا جائے گا۔دوسرے میچ میں گروپ سی کی ٹیمیں پاپوا نیو گنی اور یوگنڈاپنجہ آزمائی کریں گی ، یہ وارلڈ کپ کا 9واں میچ ہوگا جو پروویڈنس سٹیڈیم، گیانا میں کھیلا جائے گا۔ تیسرا میچ گروپ اے سے پاکستان اور امریکا کی ٹیموں کےدرمیان کھیلا جائے گا۔
گرین شرٹس اپنی مہم کا آغاز میزبان امریکا کی ٹیم کے خلاف اپنے پہلے میچ سے کرے گی اور یہ میچ گرینڈ پریری سٹیڈیم، ڈلاس میں کھیلا جائے گا۔محدود اوورز کے فارمیٹ کے نویں میگا ایونٹ کے دلچسپ مقابلے ویسٹ انڈیز اور امریکا میں جاری ہیں جس میں شائقین کرکٹ کو کانٹے دار مقابلے دیکھنے کو مل رہے ہیں۔ ٹورنامنٹ دسویں میچ میں آسٹریلیا اور اومان کی ٹیمیں بارباڈوس میں آمنے سامنے ہوں گی۔آسٹریلوی ٹیم کو مچل مارش لیڈ کر یں گے جبکہ اومان کی ٹیم عاقب الیاس کی زیرقیادت میدان میں اترے گی ۔میگا ایونٹ کا 11 واں میچ میں پاپوا نیو گنی اور یوگنڈاپنجہ آزمائی کریں گی ۔ پاپوا نیو گنی کو اسد والا لیڈ کریں گے جبکہ یوگنڈا کی ٹیم کی قیادت برائن مسابا کریں گے۔ٹورنامنٹ کا 12واں میچ پاکستان اور امریکا کی ٹیموں کے درمیان ڈلاس میں کھیلا جائے گا۔پاکستان ٹیم کی قیادت مایہ ناز بلے باز بابر اعظم کریں گے جبکہ امریکا کی ٹیم کو وکٹ کیپر بلے باز موننک پٹیل لیڈ کریں گے۔میگا ایونٹ میں 20 ٹیمیں ٹائٹل کے حصول کے لئے کوشاں ہیں۔ انگلینڈ کی ٹیم دفاعی چیمپئن ہے۔ ٹورنامنٹ کا فائنل میچ 29 جون کو بارباڈوس میں کھیلا جائے گا۔