پیرس۔7جون (اے پی پی):پولینڈ کی نامور ٹینس سٹار ،عالمی نمبر ون،دفاعی چیمپئن اور ایونٹ کی ٹاپ سیڈڈ آئیگا نتالیہ سویٹیک اور اٹلی کی ٹینس کھلاڑی جیسمین پاؤلینی فرنچ اوپن ٹینس کے خواتین کے سنگلز مقابلوں کے فائنل میں پہنچ گئیں جبکہ امریکی ٹینس سٹار اور ایونٹ کی تھرڈ سیڈڈ کوکوگف اور روسی ٹینس سٹار میرا اینڈریوا سیمی ر فائنل رائونڈ میں ہار کر باہر ہوگئیں۔ سال کے دوسرے گرینڈ سلام فرنچ اوپن کے دلچسپ مقابلوں کا سلسلہ فرانس کے دارلحکومت پیرس میں جاری ہےجس میں شائقین ٹینس کو انتہائی دلچسپ اور کانٹے دار مقابلے دیکھنے کو مل رہے ہیں۔
میگا ایونٹ کے ویمن سنگلز مقابلوں کے پہلے سیمی فائنل میچ میں پولینڈ کی آئیگا نتالیہ سویٹیک نے انتہائی شاندار کارکردگی کا مظاہرہ کرتے ہوئے حریف امریکی ٹینس سٹار اور ایونٹ کی تھرڈ سیڈڈ کوکوگف کو سٹریٹ سیٹس میں شکست دے کر فائنل کے لئے کوالیفائی کرلیا۔ دفاعی چیمپئن اور ایونٹ کی ٹاپ سیڈڈ آئیگا نتالیہ سویٹیک کی فتح کا سکور 2-6 اور 4-6 تھا۔ دوسرے سیمی فائنل میچ میں اٹلی کی ٹینس کھلاڑی جیسمین پاؤلینی نے شاندار کارکردگی کا مظاہرہ کرتے ہوئے روسی ٹینس سٹار میرا اینڈریوا کو سٹریٹ سیٹس میں 3-6 اور 1-6 سے ہرا کر ایونٹ سے باہر کر دیا۔ فائنل میچ میں پولینڈ کی آئیگا نتالیہ سویٹیک کا مقابلہ اٹلی کی ٹینس کھلاڑی جیسمین پاؤلینی ف سے ہوگا۔