لاہور۔12جون (اے پی پی):چیئرمین پاکستان کرکٹ بورڈ محسن نقوی نے قذافی سٹیڈیم میں اپ گریڈیشن کا کام رات کے اوقات میں بند ہونے پر شدید برہمی کا اظہار کیا اور ہدایت دی کہ 24گھنٹے کام کیا جائے۔ چیئرمین پی سی بی نے رات گئے قذافی سٹیڈیم کا دورہ کیا جہاں پر انہوں نے سٹیڈیم کی اپ گریڈیشن کے لئے جاری کاموں کا جائزہ لیا۔
چیئرمین پی سی بی محسن نقوی نے رات گئے کام بند ہونے پر ناراضگی کا اظہار کیا۔ ان کا کہنا تھا کہ ہفتہ کے ساتوں دن 24 گھنٹے کام کرکے ہی اس بڑے پراجیکٹ کو وقت پر مکمل کیا جا سکتا ہے۔سٹیڈیم کی مرکزی عمارت کے نیچے پائپ پھٹنے کے باعث جمع پانی کی جلد نکاسی یقینی بنائی جائے اورکام کی رفتار کو تیز کیا جائے ۔
انہوں نے کہا کہ چیمپئنز ٹرافی ٹورنامنٹ سے قبل سٹیڈیم کی اپ گریڈیشن کا کام مکمل کرنے کے لیے مزید وسائل بروئے کار لانے کی ضرورت ہے۔چیئرمین پی سی بی محسن نقوی نے جاری کاموں کا معائنہ کیا اور ضروری ہدایات دیں۔ڈائریکٹر انٹرنیشنل کرکٹ اور جنرل منیجر انفراسٹرکچر بھی اس موقع پر موجود تھے۔