ملک بھر کے صارفین نے واٹس ایپ اور انسٹاگرام کی رفتار سست ہونے کی شکایات کیں۔
پاکستان میں گزشتہ کئی دن سے انٹرنیٹ سیکیورٹی نیٹ ورک سسٹم ’فائر وال‘ کی آزمائش سے جہاں انٹرنیٹ سست رفتاری کا شکار رہی ہے، وہیں کل سے ملک بھر میں صارفین نے واٹس ایپ کی سست ہونے کی شکایت کی ہے۔
میسیجنگ ایپلیکیشن واٹس ایپ سمیت دیگر سوشل میڈیا ایپلیکیشن بھی سست روی کا شکار ہیں، صارفین کا کہنا تھا کہ میڈیا فائلز کو ڈاؤن لوڈ ہونے میں بہت زیادہ وقت لگتا ہے یا وہ فائلز ڈاؤن لوڈ ہوتی ہی نہیں۔
بعض صارفین نے واٹس ایپ اور انسٹاگرام دونوں ایپلی کیشنز کی سروس ڈاؤن ہونے کی شکایت بھی کی، تاہم زیادہ تر افراد نے بتایا کہ دونوں ایپلی کیشنز سست رفتاری کا شکار ہیں اور میسیجز درست انداز میں وصول نہیں ہو رہے اور نہ ہی میسیجز بھیجے جا رہے ہیں۔
دوسری جانب پاکستان ٹیلی کمیونی کیشن (پی ٹی اے) نے ملک میں صارفین کی جانب سے واٹس ایپ سروسز کے حوالے سے جاری مسائل کو مسترد کرتے ہوئے اسے ممکنہ ’’تکنیکی خرابی‘‘ قرار دیا ہے۔
ورلڈ پاپولیشن ریویو کی 2024 کی رپورٹ کے مطابق پاکستان میں واٹس ایپ استعمال کرنے والے افراد کی تعداد 52.3 ملین سے زائد ہے۔