حال ہی میں سابق بھارتی کرکٹر یوراج سنگھ کے والد نے بھارتی ٹیم کے سابق کپتان مہندر سنگھ دھونی پر بیٹے کا کرئیر کھانے کا الزام لگاتے ہوئے کپل دیو کو بھی تنقید کا نشانہ بنایا تھا۔
جس کے بعد سے یہ خبر سوشل میڈیا پر سرخیاں بٹور رہی ہے اور ہر طرف اسی بارے میں چہ میگوئیاں چل رہی ہیں۔ اور اب ان کے والد سے متعلق یوراج سنگھ کی ایک ویڈیو کلپ سامنے آئی ہے۔
وائرل ویڈیو میں یوراج سنگھ اس بات کا اعتراف کر رہے ہیں کہ ان کے والد کے ساتھ کچھ ذہنی مسائل ہیں۔ یہ بات انہوں نے گزشتہ سال نومبر میں ایک پوڈ کاسٹ میں بتائی تھی۔
یوراج نے اپنے اور اپنے والد کے درمیان تعلقات کے بارے میں بات کرتے ہوئے کہا تھا کہ، "مجھے لگتا ہے کہ میرے والد کو ذہنی مسائل ہیں، لیکن وہ اسے قبول نہیں کرتے۔"
ان کا کہنا تھا کہ، "والد صاحب زندگی کی ہر جنگ میں کامیاب رہے ہیں، مگر وہ کچھ چیزوں کو قبول نہیں کرتے جبکہ انہیں ان چیزوں پر دھیان دینے کی ضرورت ہے۔"
ماضی میں دیے گئے اس انٹرویو کی یہ کلپ ایک ایسے وقت میں سامنے آئی ہے جب ان کے والد مہندر سنگھ دھونی اور کپل دیو پر تنقید کے باعث خبروں کا حصہ بنے ہوئے ہیں۔