فیلڈ مارشل عاصم منیر نے سول سروسز اکیڈمی کے 52 ویں کامن ٹریننگ پروگرام کےزیر تربیت افسران سے ملاقات کی۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر نے کہا کہ نوجوان افسران دیانتداری، پیشہ ورانہ مہارت اور وطن سے خلوص کے اعلیٰ ترین معیارات کو اپنائیں اور قوم کی خدمت کو نصب العین بنائیں۔
ملاقات میں فیلڈ مارشل عاصم منیر نے شرکا سے قومی سلامتی، داخلی و خارجی چیلنجز ، علاقائی امن و استحکام میں افواج کے کردار پر گفتگو کی جبکہ آرمی چیف نے ریاستی نظم ونسق کے ڈھانچے میں باصلاحیت سول بیوروکریسی کے ناگزیر کردار کو بھی اجاگر کیا۔
آئی ایس پی آر کے مطابق کامن ٹریننگ پروگرام کے شرکانے سینئر عسکری قیادت سے براہ راست ملاقات اور فوج کے اسٹریٹیجک وژن، آپریشنل تیاری کو سراہا۔
آئی ایس پی آر کے مطابق ملاقات سوال جواب کے بامقصد سیشن کے ساتھ اختتام پذیر ہوئی۔