بالی ووڈ کی دلکش جوڑی دیپیکا پڈوکون اور رنویر سنگھ نے اپنی ننھی پری کے نام کا اعلان کر دیا، جس نے مداحوں کے دل موہ لیے۔ دیپیکا اور رنویر، جو کہ 14 نومبر 2018 کو ازدواجی زندگی میں بندھے تھے، حال ہی میں 9 ستمبر کو اپنی پہلی بیٹی کے والدین بنے۔
بھارتی میڈیا کے مطابق، دیوالی کے پُرمسرت موقع پر اس جوڑی نے سوشل میڈیا پر اپنی بیٹی کی تصویر شیئر کی اور مداحوں کو اپنے نئے سفر سے متعارف کرایا۔ تصویر میں بچی کے سرخ لباس میں صرف پیر نظر آ رہے تھے، جس نے سادگی اور محبت بھرا پیغام دیا۔
دیپیکا اور رنویر نے اپنی بیٹی کا نام ’دعا پڈوکون سنگھ‘ رکھا اور اس کی معنویت بتاتے ہوئے لکھا کہ یہ ہماری دعاؤں کا جواب ہے۔ انہوں نے مزید کہا کہ ان کے دل خوشی اور شکر گزاری سے بھرے ہوئے ہیں۔
معروف اداکار ول اسمتھ نے بھی جوڑے کو مبارکباد دی، جبکہ ماضی میں ایک انٹرویو کے دوران رنویر نے انکشاف کیا تھا کہ انہوں نے اپنے بچے کے ناموں کی فہرست بنائی ہوئی ہے۔ انہوں نے بیٹے کا نام ’شوریہ ویر سنگھ‘ سوچ رکھا تھا، مگر بیٹی کی پیدائش کی صورت میں انہیں خوشی اور بھی زیادہ ہوتی۔
دیپ ویر کے چاہنے والوں نے اس نام کو محبت اور خوبصورتی کے امتزاج سے بھرپور قرار دیا اور سوشل میڈیا پر خوشیوں بھرے پیغامات کا تانتا بندھ گیا۔