"میں آپ سب کی طرف سے ملنے والی محبت اور فکر پر شکر گزار ہوں۔ آپ پوچھتے رہتے ہیں کہ میں کیسا محسوس کر رہی ہوں، تو میں بتا دوں کہ میں اب بھی اس حقیقت کو قبول کرنے کی کوشش کر رہی ہوں جو میں نے (شوہر کی بیماری کے) پورے سفر میں دیکھی۔ میں سوچتی تھی کہ میں ذہنی طور پر تیار ہوں، لیکن یہ میرے لیے ایک سخت دھچکا تھا۔ مجھے یقین ہے کہ عدت وہ وقت ہے جب ایک عورت اپنی ذات کو سمجھنے، اپنی طاقت تلاش کرنے، اور آگے بڑھنے کا ہنر سیکھتی ہے۔"
پاکستان کی نامور اداکارہ شگفتہ اعجاز، جو اپنے شوہر یحییٰ صدیقی کے انتقال کے بعد عدت کے وقت سے گزر رہی ہیں، نے اپنے مداحوں کے ساتھ اپنے جذباتی تجربات شیئر کیے ہیں۔ انسٹاگرام پر ایک دل کو چھو لینے والے پیغام میں انہوں نے اپنی زندگی کے مشکل ترین لمحات کے بارے میں کھل کر بات کی، جہاں وہ دکھ، صبر، اور حوصلے کے درمیان اپنی زندگی کو سنوارنے کی کوشش کر رہی ہیں۔
شگفتہ نے اپنی پوسٹ میں پرانی موم بتیوں کی تصاویر شیئر کیں، جنہیں انہوں نے نئے سانچوں میں ڈھال کر دوبارہ تخلیق کیا۔ ان موم بتیوں کو یاد کرتے ہوئے انہوں نے بتایا کہ یہ وہی موم بتیاں ہیں جنہیں ان کے شوہر کے ساتھ خوشیوں کے لمحوں میں جلایا گیا تھا۔ ان کے لیے یہ عمل صرف موم بتیوں کو نئی شکل دینا نہیں، بلکہ ان یادوں کو دوبارہ زندہ کرنے کی ایک کوشش تھی، جو ان کی زندگی کا حصہ بن چکی ہیں۔
شگفتہ نے جذباتی انداز میں اپنے شوہر کی فلم "بادل اور بجلی" کے مشہور گانے ’آج جانے کی ضد نہ کرو‘ کا ذکر بھی کیا، جو ان کے لیے ایک خاص یادگار حیثیت رکھتا ہے۔ انہوں نے لکھا کہ وہ اس وقت اپنی زندگی کی سمت دوبارہ ترتیب دینے کی جدوجہد کر رہی ہیں اور مداحوں سے درخواست کی کہ وہ انہیں اپنی دعاؤں میں یاد رکھیں۔
ایک سنگل پیرنٹ کے طور پر، انہوں نے عزم ظاہر کیا کہ وہ اپنی بیٹیوں کی پرورش کی تمام ذمہ داریاں مزید حوصلے اور لگن کے ساتھ نبھائیں گی، جیسا کہ ان کے شوہر نے انہیں ہمیشہ سپورٹ کیا۔ شگفتہ کے شوہر یحییٰ صدیقی، جو فلم پروڈیوسر اور شوبز سے وابستہ تھے، اپنی زندگی میں ان کے لیے نہایت مضبوط سہارا تھے۔
یہ دلگیر داستان، جہاں غم اور جدوجہد کی تصویر ہے، وہیں شگفتہ کی قوتِ ارادی اور امید کا پیغام بھی دیتی ہے، جو دکھوں کے درمیان روشنی کی کرن بن کر سامنے آتی ہے۔