پابندی سے چند گھنٹے قبل ہی امریکا بھر میں ٹک ٹاک بند ہو گیا ہے۔
امریکی میڈیا کے مطابق ہفتے کی رات سے ٹک ٹاک نے کام کرنا بند کر دیا ہے، ٹک ٹاک اب ایپل اور گوگل ایپ اسٹورز پر ڈاؤن لوڈ کے لیے دستیاب نہیں ہے۔
ٹک ٹاک نے امریکی صارفین کو خبردار کیا ہے کہ یہ ایپ عارضی طور پر دستیاب نہیں ہوگی، اس کی جلد بحالی کے لیے کام کیا جا رہا ہے۔
واضح رہے کہ امریکی صدر ڈونلڈ ٹرمپ نے کہا ہے کہ وہ حلف اٹھانے کے بعد ٹک ٹاک کو ممکنہ پابندی سے بچنے کے لیے 90 دن کی مہلت دینے کا فیصلہ کر سکتے ہیں۔
یادر ہے کہ امریکی حکومت نے ٹک ٹاک پر قومی سلامتی کے حوالے سے خدشات کا اظہار کرتے ہوئے پابندی لگائی ہے، لیکن دوسری طرف صورت حال یہ ہے کہ امریکا میں ٹک ٹاک کے 17 کروڑ صارفین ہیں۔
جمعہ کو امریکی سپریم کورٹ کے متفقہ فیصلے میں ججز نے کہا تھا کہ کانگریس کی جانب سے پچھلے سال ٹک ٹاک پر پابندی کا فیصلہ کیا گیا تھا، یہ فیصلہ آزادئ اظہار رائے سے متعلق امریکی آئین کی پہلی ترمیم کی خلاف ورزی نہیں کرتا۔ دوران سماعت امریکی وزارت انصاف نے کہا کہ ٹک ٹاک پر چینی حکومت کا کنٹرول امریکا کے لیے خطرہ ہے۔
کانگریس کے پاس کردہ قانون کے تحت اگر ٹک ٹاک کی جانب سے اس کے امریکا میں آپریشنز کو 19 جنوری تک فروخت نہیں کیا جاتا تو اس پر پابندی عائد کر دی جائے گی۔