قومی ٹیم کے سابق کپتان بابراعظم اور ون ڈے ٹیم کے کپتان محمد رضوان نے قومی کرکٹ ٹیم کے آف اسپنر ساجد خان کی خواہش پوری کردی۔
ساجد خان کا ملتان ٹیسٹ کے دوسرے روز کے اختتام پر پریس کانفرنس میں کہنا تھا کہ میری خواہش ہے کہ ویسٹ انڈیز کی دوسری اننگز میں اگر 5 کھلاڑی آؤٹ کروں تو محمد رضوان اور بابر اعظم سے بھی اپنے روایتی انداز میں جشن کرواؤں۔
ساجد نے ملتان ٹیسٹ کے تیسرے روز پانچویں وکٹ حاصل کی تو بابراعظم اور محمد رضوان بھی ساجد خان کے ساتھ جشن میں شامل ہوئے اور انہیں کے انداز میں وکٹ کا جشن منایا۔
قبل ازیں پاکستان اور ویسٹ انڈیز کے درمیان پہلے ٹیسٹ میں اس وقت دلچسپ صورتحال دیکھنے میں آئی جب بابر نے ساجد کے سر کو طبلہ سمجھ کر بجادیا۔
ملتان ٹیسٹ کی دوسری اننگز میں جب ساجد نے ویسٹ انڈین بیٹر کو پویلین بھیجا تو بابر کے خوشی منانے کا انداز دیدنی تھا، سابق کپتان نے اسپنر ساجد کے سر پر طبلہ بجایا جس کی ویڈیو سوشل میڈیا وائرل ہوگئی۔
ساجد نے دوسری اننگز میں لنچ بریک تک 4 ویسٹ انڈین کھلاڑیوں کو آؤٹ کیا تھا، تاہم کیویم ہوج کے صفر پر آؤٹ ہونے کے بعد اسپنر کے ارد گرد ساتھی کھلاڑی جمع ہوگئے۔
اس دوران بابراعظم کی خوشی دیدنی تھی انھوں نے آف اسپنر کے سر پر زبردست انداز میں طبلہ بجایا اور مسکراتے ہوئے بھی نظر آئے۔
وائرل ہونے والی ویڈیو پر ایک صارف نے سابق قومی کپتان پر تنقید کرتے ہوئے کہا کہ وہ دونوں اننگز میں ناکام رہے ہیں بابراعظم کو چیئر لیڈر بننے کے بجائے اپنی بیٹنگ پر توجہ دینی چاہیے۔