پاکستان شوبز انڈسٹری کے معروف اداکار کبریٰ خان اور مرزا گوہر رشید سعودی عرب میں نکاح کے بندھن میں بندھ گئے۔
معروف اداکاروں نے کچھ روز قبل مبہم انداز میں انسٹاگرام ویڈیو کے ذریعے اپنی شادی کا عندیہ دیا تھا۔
دونوں اداکار ان دنوں اسکرین سے دور تاہم، اپنی شادی کی تیاریوں میں مصروف ہیں۔
گزشتہ کچھ روز سے پاکستان میں دونوں کی شادی کی تقریبات کا سلسلہ جاری تھا۔
نکاح سے قبل گوہر رشید اور کبریٰ خان کے دوستوں نے ان کے لیے ڈھولکی اور گیم نائٹ کا بھی انعقاد کیا۔
کبریٰ خان نے تصاویر اور ویڈیو شیئرنگ ایپ پر ایک تصویر شیئر کی، جس میں دونوں کو خانہ کعبہ کے سامنے دیکھا جا سکتا ہے۔
مرزا گوہر رشید احرام میں ، جب کہ اداکارہ سفید رنگ کے عبایا میں نظر آئیں۔
جب کہ دوسری تصویر میں دونوں نے خانہ کعبہ پر ہاتھ رکھا ہوا ہے، اس موقع پر ان کے ہاتھ میں انگوٹھیاں بھی صاف نظر آرہی ہیں۔
دونوں نے مقدس مقام پر نکاح کیا اور اس حوالے سے ایک پوسٹ بھی شیئر کی۔
اداکارہ نے ’قبول ہے‘ لکھتے ہوئے کیپشن لکھا کہ’70 ہزار فرشتے گواہ ہیں اور اللہ کی رحمت ہم پر بارش کی طرح برس رہی ہے۔’
نکاح کی تصاویر وائرل ہونے کے بعد سوشل میڈیا صارفین اور ساتھی اداکاروں کی جانب سے دونوں کے لیے نیک خواہشات کے اظہار کا سلسلہ جاری ہے۔
یاد رہے کہ گزشتہ کچھ روز سے یہ خبریں گردش کر رہی تھیں کہ اسٹار جوڑی سعودی عرب میں نکاح کرے گی، تاہم تاریخ کا اعلان نہیں کیا گیا تھا۔
چند روز قبل اداکارہ مومل شیخ نے بھی ایک تصویر شیئر کی تھی، جس میں ان کا اور ان کے شوہر کا پاسپورٹ اور ایک تسبیح بھی نظر آرہی تھی۔
جس کے بعد کہا گیا تھا کہ دونوں کبریٰ خان اور گوہر رشید کی شادی کے لیے سعودی عرب روانہ ہوئے ہیں۔
شوبز شخصیات کی جانب سے دونوں کی شادی کی تقریبات کی تصاویر اور ویڈیوز کے ساتھ ’میرے یار کی شادی ہے‘ کا ہیش ٹیگ بھی استعمال کیا جا رہا ہے۔