حماس کی جانب سے 4 مغویوں کی لاشیں واپس ملنے کے بعد اسرائیل نے سیکڑوں فلسطینی قیدی رہا کردیے۔ عرب میڈیا کے مطابق جنگ بندی معاہدے کے تحت رہا کیے گئے قیدیوں کی زیادہ تر تعداد غزہ کے یورپین اسپتال پہنچی ہے۔
عرب میڈیا کے مطابق جہاں زخمی اور بیمار لوگوں کو طبی امداد دی جائے گی جب کہ بہت سے قیدی بسوں میں فلسطین کے مغربی کنارے بھی پہنچے۔
عرب میڈیا کا بتانا ہےکہ اسرائیلی قید سے واپس آنے والے کئی قیدیوں کی حالت کمزور تھی، کچھ کے اعضاء نہیں تھے (نکالے گئے) جب کہ کچھ کو ان کے زخموں کی شدت کی وجہ سے ایمبولینس میں غزہ منتقل کیا گیا۔
رپورٹ میں بتایا گیا ہے کہ اسرائیل 97 فلسطینی قیدیوں کو مصری حکام کے حوالے بھی کرے گا تاہم اس حوالے سے ابھی مزید تفصیل سامنے نہیں آئی۔
یاد رہےکہ گزشتہ ہفتے قیدیوں کی رہائی کے حوالے سے پیدا ہونے والے بحران کو حل کرنے کے لیے حماس اور اسرائیل کے درمیان 4 مزید یرغمالیوں کی لاشوں کے بدلے 620 فلسطینی قیدیوں کی رہائی پر اتفاق ہوا تھا۔
600 سے زائد فلسطینی قیدی جو پچھلے ہفتے رہا ہونے تھے لیکن اسرائیل کی جانب سے ان کی رہائی روک دی گئی تھی تاہم گزشتہ رات حماس کی جانب سے اسرائیلی مغویوں کی لاشیں واپس کرنے کے بعد آج اسرائیل نے فلسطینی قیدی رہا کردیے۔