بالی وڈ کے میگا اسٹار امیتابھ بچن کی جانب سے حال ہی میں کی گئی ٹوئٹ سے مداحوں میں تشویش کی لہر دوڑ گئی۔
امیتابھ بچن نے ایکس (ٹوئٹر) پر ٹوئٹ کرتے ہوئے لکھا کہ ’Time to go (جانے کا وقت آگیا ہے )‘، اس ٹوئٹ نے مداحوں کے درمیان کئی قیاس آرائیوں کو جنم دے دیا۔
متعدد سوشل میڈیا صارفین کا ماننا تھا کہ لیجنڈری اداکار کی ٹوئٹ ان کی فلموں اور بھارتی کوئز شو’ کون بنے گا کروڑ پتی‘ سے ریٹائرمنٹ کا اشارہ ہے۔
دوسری جانب کئی مداحوں نے اس ٹوئٹ کو ان کی خرابی صحت سے جوڑتے ہوئے تشویش کا اظہار کیا، یوں ایکس ٹوئٹر پر بگ بی کے مداحوں نے سوالات کی بھرمار کردی۔
معمہ آخر کار ’کون بنے گا کروڑ پتی 16 ‘کے تازہ ترین ایپی سوڈ میں حل ہو گیا، جس دوران شائقین نے ان سے ان کی ٹوئٹ ’ Time to go ‘ کی وضاحت طلب کی ؟ جس پر بگ بی نے جواب دیا کہ ’ و ہ ایک لائن تھی کہ جانے کا وقت ہے، تو اس میں گڑبڑ کیا ہے؟
جس پر ایک شخص نے بگ بی سے سوال کیا کہ سر کہاں جانے کا وقت ہے؟ تاہم ان کے جواب سے قبل ہی پورا اسٹوڈیو یک زبان ہو کر بولا، ’ آپ یہاں ( شو) سے نہیں جا سکتے!
بالاخر تمام افواہوں کو دور کرتے ہوئےامیتابھ بچن نے بتایا کہ’ ارے !، ہمارے کام سے جانے کا وقت آگیا ہے، آپ عجیب بات کرتے ہیں! رات کے 2 بجے ہمیں یہاں سے چھٹی ملتی ہے تو ہمیں گھر پہنچتے پہنچتے کافی دیر ہو جاتی ہے، تو یہی لکھاتھا لیکن لکھتے ہوئے ہمیں نیند آگئی اور ٹوئٹ ادھوری رہ گئی‘۔