بھارت کی کناڈا فلموں کی اداکارہ رانیا راؤ کو رنگے ہاتھوں 14 کلو گرام سے زائد سونے کی اسمگلنگ کے جرم میں گرفتار کرلیا گیا۔
بھارتی میڈیا رپورٹس کے مطابق ڈائریکٹوریٹ آف ریونیو انٹیلی جنس (ڈی آر آئی) کے اہلکاروں نے کناڈا اداکارہ رانیا راؤ کو بنگلورو انٹرنیشنل ائیرپورٹ پرگرفتار کیا ہے اور اداکارہ کے پاس سے 14.8 کلو گرام سونا بھی ضبط کیا گیا ہے۔
بھارتی میڈیا کا بتانا ہے کہ اداکارہ نے گزشتہ 15 روز میں 4 مرتبہ دبئی کا دورہ کیا تھا اور دبئی کے مسلسل دوروں کی وجہ سے وہ ڈی آر آئی حکام کی نگرانی میں تھیں۔
2 روز قبل اداکارہ دبئی سے بنگلورو ائیر پورٹ پہنچی تھیں جس دوران پولیس کے ہتھے چڑھ گئیں، تلاشی کے دوران پتا چلا کہ اداکارہ نے مبینہ طور پرجیکٹ میں بھاری مقدار میں سونا چھپا کر اسے پہن رکھا تھا اور کپڑوں میں سونے کی سلاخیں چھپا کر سونا اسمگل کر رہی تھیں۔
بھارتی میڈیا پر اداکارہ کے پاس سے برآمد ہونے والے سونے کی قیمت تقریباً 12 کروڑ بھارتی روپے بتائی گئی ہے۔
بھارتی میڈیا کا کہنا ہےکہ رانیا راؤ نے ائیر پورٹ پہنچنے پر ڈائریکٹر جنرل آف پولیس (ڈی جی پی) کی بیٹی ہونے کا بھی دعویٰ کیا جس کے بعد ان کے دعوے کی جانچ کی جارہی ہے۔
دوسری جانب گرفتاری کے بعداداکارہ سے پوچھ گچھ کا سلسلہ جاری ہے اور انہیں جلد ہی بنگلورو کی عدالت میں پیش کیا جائے گا۔
واضح رہے کہ رانیا راؤ فلم 'مانکیا' میں کناڈا سپر اسٹار سدیپ کے مدمقابل کردار نبھانے کیلئےمشہور ہیں۔