انٹرنیشنل اسپیس اسٹیشن میں پھنسے 2 امریکی خلاباز 9 ماہ بعد بحفاظت زمین پر واپس آگئے۔
جون 2024 میں 8 روزہ مشن پر انٹرنیشنل اسپیس اسٹیشن (آئی ایس ایس) میں جانے والے 2 امریکی خلا باز آخرکار 9 ماہ بعد بحفاظت زمین پر واپس لوٹ آئے۔
امریکی خلا بازبُچ وِلمور اورسنیتا ولیمز جون 2024 میں بوئنگ کے اسٹار لائنر اسپیس کرافٹ کی اولین انسان بردار پرواز کے ذریعے آئی ایس ایس پہنچے تھے مگر خلائی جہاز میں فنی خرابی کے باعث وہ اسٹیشن پر ہی رکنے پر مجبور ہو گئےتھے۔
ناسا نے فیصلہ کیا تھا کہ خلابازوں کو انٹرنیشنل اسپیس اسٹیشنپر ہی رکھا جائے اور اعلان کیا گیا تھا کہ دونوں کی واپسی اسپیس ایکس کے ڈریگن اسپیس کرافٹ سے ہوگی۔
منگل کو اسپیس کرافٹ ڈریگن کیپسول بُچ وِلمور اورسنیتا ولیمز کو 9 ماہ بعد زمین پر واپس لے آیا۔ ناسا کے 2 اورخلا باز بھی انٹرنیشنل اسپیس اسٹیشن سے ان کے ساتھ واپس آئے ہیں۔
غیر ملکی میڈیا رپورٹس کے مطابق اسپیس ایکس کا ڈریگن کیپسول،امریکی خلا بازوں کو لے کر فلوریڈا کے ساحل کے قریب بحفاظت سمندر میں اترا۔
خلابازوں نے انٹرنیشنل اسپیس اسٹیشن سے زمین تک پہنچنے میں تقریباً 17 گھنٹے کا سفر طے کیا۔
امریکی خلابازوں نے کہا کہ انہوں نے اس مشن سے لطف اٹھایا، سنیتا ولیمز نے اسپیس اسٹیشن کو اپنا بہترین مقام قرار دیا۔
واضح رہے کہ یہ مشن ستمبر 2024 میں لوگوں کو لے کر آئی ایس ایس پہنچا تھا اور اب زمین پر 9 ماہ سے خلا میں پھنسے خلا بازوں کو واپس لے کر لوٹا ہے۔
طویل عرصے تک خلا میں پھنسے رہنے والے جوڑے نے اس عرصے میں وہاں سائنسی تجربات کیے جبکہ آئی ایس ایس کی مرمت میں بھی حصہ لیا۔ سنیتا ولیمز نے خلا میں چہل قدمی بھی کی۔