وزیراعلیٰ سندھ مراد علی شاہ نے کہا ہے کہ وزیراعظم اور ان کی ٹیم نے عوامی مؤقف سن کر نہروں کا مسئلہ خوش اسلوبی سےسلجھایا۔
وزیراعلیٰ سندھ سے گورنر پنجاب سلیم حیدر کی ملاقات ہوئی جس دوران متنازع کینالوں کا مسئلہ حل ہونے پر دونوں رہنماؤں نے ایک دوسرے کو مبارکباد دی۔ اس موقع پر وزیراعلیٰ سندھ نے کہا کہ چیئرمین بلاول بھٹو زرداری کی سیاسی بصیرت سے نہری تنازع حل ہوا، وزیراعظم اور ان کی ٹیم نے عوامی مؤقف کو سنا، مسئلہ خوش اسلوبی سے سلجھایا۔
مراد علی شاہ کا کہنا تھا کہ قوم متحد ہے، بھارت کسی بھی جارحیت کاسوچ بھی نہیں سکتا، پاکستان کے داخلی استحکام میں تمام صوبے اہم کردار ادا کررہے ہیں۔ وزیراعلیٰ نے مزید کہا کہ سندھ حکومت قومی مفادات پر کوئی سمجھوتا نہیں کرے گی، سندھ اور پنجاب کے درمیان تعاون ملکی ترقی کا ضامن ہے۔