این ڈی ٹی وی سپورٹس کے مطابق انڈین کرکٹر محمد شامی کو ای میل کے ذریعے جان سے مارنے کی دھمکی موصول ہوئی ہے۔
اتوار کے روز اتر پردیش کے ضلع امروہہ کے سائبر کرائم پولیس سٹیشن میں محمد شامی کے بھائی حسیب نے واقعے کی ایف آئی آر درج کروائی۔
ایف آئی آر کے مطابق راجپوت سندر نامی شخص نے ای میل کے ذریعے شامی کو جان سے مارنے کی دھمکی دی اور ایک کروڑ انڈین روپے کا مطالبہ کیا۔
محمد شامی انڈیا میں کھیلی جا رہی انڈین پریمئر لیگ کا حصہ ہیں اور رواں سیزن سن رائزر حیدر آباد کے لیے کھیل رہے ہیں۔
اس سے قبل انڈین کرکٹ ٹیم کے ہیڈ کوچ گوتم گمبھیر کو بھی ای میل کے ذریعے جان سے مارنے کی دھمکی موصول ہوئی تھی۔
ڈی سی پی (سنٹرل) وی ہرشا وردھن کا کہنا تھا کہ ’ہمیں گوتم گمبھیر سے منسلک ایک ای میل آئی ڈی پر موصول ہونے والی مبینہ دھمکی کے بارے میں مطلع کیا گیا ہے۔ اس معاملے کی جانچ کی جا رہی ہے۔ گوتم گمبھیر پہلے ہی دہلی پولیس کی حفاظت میں ہیں اور ہم مخصوص حفاظتی انتظامات پر تبصرہ نہیں کرتے۔‘
انڈین میڈیا کا دعویٰ ہے کہ پہلگام حملے کے بعد گوتم گمبھیر کو جان سے مارنے کی دھمکیاں ملیں۔