سر سید شناسی
(Prof. Dr Rais Ahmed Samdani, Karachi)
سر سید شناسی
(سر سید احمد خان کے 2006 ء ویں یوم پیدائش پر سر سید یونیورسٹی آف انجینیرنگ اینڈ ٹیکنالوجی
کے زیر اہتمام ”یوم سر سید“حسب روایت 29اکتوبر 2023ء کوعلیگانہ انداز سے تقریب
کا اہتمام کیا گیا۔ راقم نے اس موقع پر حسب ذیل مضمون سامعین کی نذر کیا)
٭
ڈاکٹر رئیس احمد صمدانی
پروفیسر ایمریٹس۔منہاج یونیورسٹی، لاہور
سر سید کی شخصیت اور ان کی خدمات پر قلم اٹھانا کوئی آسان نہیں۔ بابائے اردو مولوی عبد الحق کا کہنا تھا کہ’’اس عہد اور ماحول کو پیش نظر رکھ کر سرسید کی زندگی کے کارناموں کی صحیح تصوریر کھینچنا بڑی محنت اور فرصت کا کام ہے اور شاید میں اس کام کا اہل بھی نہیں“۔ایک ایسا شخص جسے کئی سال سرسید کو قریب سے دیکھنے، ان کے ساتھ اٹھنے بیٹھنے کا موقع ملا ہو، لکھنے کی عمدہ ترین استطاعت رکھتا ہو اور پھریہ کہ وہ سرسید کا مداح اور ان کے خیالات و نظریات سے ہم آہنگ بھی ہو اپنے آپ کو سرسید جیسی شخصیت پر لکھنے کا اہل نہیں سمجھ رہا تو مَیں کیا میری بساط کیا، نہ ہی یہ میرا مقام ہے کہ میں علم کے اتنے عظیم مدبر، مصلح، مصنف، رہبرو رہنما، علی گڑھ مسلم یونیورسٹی کے بانی، جدید علم کی ترسیل و تبلیغ کے مُخترع،ایک نقطہ نظر و تحریک کے مبدع شخصیت پر قلم اٹھاؤں۔ لیکن یہ بھی دستور ہے زمانے کا، لکھاریوں کا، مورخین کا کہ وہ بساط بھر حصہ ڈالتے ہیں عظیم شخصیات کی عظمت کو اور زیادہ عظیم کرنے میں حالانکہ وہ تو پہلے ہی عظمت کی بلندیوں کو چھو رہے ہوتے ہیں۔ میرا خیال ہے کہ جس طرح عظیم لوگوں کو دیکھ لینا عظمت ہے اسی طرح عظیم شخصیات پر اپنی بساط کے مطابق قلم کی روشنی کو روشن چراغ کے ایندھن میں شامل کر لینا ہی مجھ جیسے ھیچ مدان کے لیے بڑی بات ہے۔ مَیں علم و عمل کے اس کلاں کو ’یوم سر سید‘ کے موقع پر خراج تحسین پیش کرنا چاہتا ہوں۔سر سید احمد خان 17اکتوبر 1817ء کو پید ا ہوئے اور 27 مارچ 1898کو دنیاسے ہمیشہ ہمیشہ کے لیے رخصت ہوئے۔ سر سید مسلمانوں کے دلوں میں آج بھی موجود ہیں۔ ان کی علمی وادبی سوچ وفکر، ان کا فلسفہ آج بھی ہماری رہنمائی و رہبری کر رہا ہے۔سرسید کے بارے میں
الطاف حسین حالیؔ نے کہا ؎
بعدِ قرونِ اولیٰ کس نے کیا بتاؤ
سید نے کام آکر جو قوم میں کیا ہے
معروف صحافی مجیب الرحمٰن شامی کا کہناہے کہ ’سرسید احمد خان نہ ہوتے تو پاکستان وجود میں نہ آتا۔ جس درخت کی چھاؤں میں آج ہم بیٹھے ہیں اس کا بیج ا نہوں نے ہی ڈالا‘۔ قیوم نظامی نے کہا تھا کہ’ہم وہ قوم ہیں جو اپنے ہیروز کو اور ان کی قربانیوں کو کبھی فراموش نہیں کرتے۔ قائد اعظم، علامہ اقبال اور سر سید احمد خان وہ ہیروز ہیں جنہوں نے ہمیں ایک آزاد ملک دیا، ان کے بنا پاکستان کا وجود نہ ممکن تھا۔ سر سید کے حاصلات محض علی گڑھ مسلم یونیورسٹی کے قیام تک محدود نہیں بلکہ انہوں نے زندگی کے بے شمار میدانوں میں کار ہائے نمایاں انجام دیے۔وہ اپنی سیکولر اور سائنسی فکر سے ہندوستانی معاشرہ میں مثبت تبدیلی لانے میں کامیاب ہوئے، وہ انسانیت کے علمبردار تھے، سر سید کا نظریہ علی گڑھ مسلم یونیورسٹی تعلیمی ادارے کی شکل میں قائم کر کے سماجی سیاسی
اور ثقافتی تحریک چلانا تھا تاکہ عوام خود کفیل ہوسکیں اور قومی ترقی میں اقلیتوں کی سرگرم حصہ داری ہو“۔
سر سید احمد خان کی زندگی کی کہانی کا جائزہ ہمیں بتا تا ہے کہ سرسید جنہوں نے کمشنر کے دفتر میں نائب منشی کی حیثیت سے عملی زندگی کا آغاز کیا۔ ذہین تھے منشی ہوگئے، پھرمنصفی کے امتحان میں شریک ہوئے کامیاب قرار پائے اور منصف (جج)بن گئے۔ انصاف پسند، نڈر، بے باک، اپنے فیصلے پر قائم رہنے والے تھے چنانچہ بے شمار مخلوق کو انصاف فراہم کیا۔ اللہ نے سرسید سے اس کے علاوہ بھی بہت سے کا م لینا تھے۔ 1876میں سرکاری ملازمت سے ریٹائر ہوئے اور علی گڑھ کو اپنا مرکز و منبع بنایا۔ امپیریل کانسل کے رکن، ایجوکیشن کیمشن کے رکن اور پبلک سروس کمیشن کے رکن کی حیثیت سے خدمات انجام دیں۔ سرسید بنیادی طور پر مصنف تھے، سرکاری ملازمت میں رہتے ہوئے بھی انہوں نے لکھنے کا آغاز کردیا تھا اور کئی کتابیں بھی لکھ چکے تھے۔ اسی زمانے میں انہیں یہ احساس ہوگیاتھا کہ سرکاری ملازمت ان کے اصل مقاصد کی تکمیل میں رکاوٹ بن رہی ہیں۔ حالانکہ حکومت ان کی ایمانداری، سچائی، محنت سے کام کرنے کی دل سے قدر داں تھی یہی وجہ ہے کہ حکومت نے انہیں ’سر‘ کے خطاب سے نوازا اور اسی حوالے سے وہ ’سر سید‘ کے نام سے معروف ہوئے حالانکہ ان کا اصل نام ’احمد‘ ہے۔ اس کے باوجود انہوں نے یہ محسوس کر لیاتھا کہ وہ آیندہ زندگی میں جو کچھ کرنا چاہتے ہیں اس میں سرکار انہیں برداشت نہیں کرے گی چنانچہ وہ سرکاری ملازمت سے مستعفی ہوگئے
اور آزادی سے تصنیفی، تالیفی اور علم کے فروغ کی تحریک میں اپنی زندگی وقف کردی۔
سرسید ایک شخصیت کا نام نہیں بلکہ وہ اپنی ذات میں ایک انجمن کی حیثیت رکھتے ہیں۔ انہوں نے اپنی ذاتی حیثیت میں جو کچھ لکھا وہ تو اپنے جگہ معیار و تعداد کے اعتبار سے منفرد ہے مسلمانوں میں علم کے حصول کی جو تحریک انہوں نے شروع کی اور انگریزی سیکھنے کا مشورہ دیا اس کو بنیاد بنا کر انہیں فتووں اور کافروں کا ساتھی قرار دیا گیا لیکن یہ مرد آہن، استقامت کا پہاڑ ثابت قدمی کے ساتھ، لوہے کی لاٹھ اور چٹان کی طرح مضبوطی سے اپنے موقف پرڈٹا رہااور کامیاب و کامران رہا۔ ایک وقت آیا کے لوگوں نے سرسید کی خیالات کی و نظریات کی نہ صرف تائید کی بلکہ انہیں وقت کی ضرورت قرار دیا۔سرسید کے خیالات و نظریات کی ناقدری بھی کی گئی، ان کے لیے عجیب و غریب قسم کے الفاظ اور جملے بھی کہے گئے۔ فتوے بھی جاری ہوئے۔ قدر دانوں نے ان کی قدردانی بھی کی انہیں قوم کی ناؤ کھینے والا بھی کہا گیا۔اپنے نظریے کو عام کرنے اپنی بات کو سمجھانے اور مسلمانوں تک پہنچانے کے لیے سرسید نے اپنی تحریروں کا سہارا لیا۔ ان میں تصانیف و تالیفات بھی ہیں اور اخبارت و رسائل میں شائع شدہ مضامین بھی۔وہ مسلسل لکھتے رہیے اور چھپتے رہے۔ ان کی حیثیتوں کا تعین کرنا کہ ان کی خدمات میں سے زیادہ کسے مقدم رکھا جائے مشکل ہے۔ وہ ہمیں منصف بھی نظر آتے ہیں، وہ مذہبی مصلح بھی دکھائی دیتے ہیں،جدید علم الکلام کی بنیاد ڈالی جس کی بناء پر قرآن مجید کے مندرجات کو عقل و سائنس کی روشنی میں تفصیل سے بیان کیا، قومی رہنما تو وہ تھے ہی، تعلیمی خدمات میں انہوں نے مسلمانوں سے کہا کہ ترقی کرنی ہے تو علم حاصل کرو۔ سر سیدبلا تفریق ہندوستان کے تمام لوگوں بشمول ہندو اور مسلمانوں کو یکساں تعلیم حاصل کرنے کے خواہ تھے۔ ا س دور میں وہ دونوں قومیتوں کو ایک ہی نظر سے دیکھ رہے تھے۔ پھر ان کی سوچ میں تبدیلی آئی اور انہوں نے مسلمانوں کو خاص طو ر پر تعلیم حاصل کرنے کی تلقین کی ساتھ ہی وہ اردو زبان کے لیے سوچنے لگے۔ سرسید کو انگریزی کے علاوہ فارسی، عربی اردو پر بھی دسترس حاصل تھی۔ انہوں نے مسلمان مفکرین کے خیالا ت و نظریات کا مطالعہ کیا خاص طو رپر صحابی، رومی اور غالب ؔ کو پڑھا۔ سرسید جو دیکھنے میں
مولوی لگتے تھے باوجود اس کے کہ انہیں دینی علوم پر بے انتہا دسترس حاصل تھی وہ ایک اچھے تیراک، پہلوانی کے ماہر اور دیگر کھیلوں میں بھی حصہ لیا کرتے تھے۔ انہوں نے مغلیہ دور کی عدالتوں کی ثقافتی سرگرمیوں میں بھی بڑھ چڑھ کر حصہ لیا۔
سرسید کے ادبی کارناموں میں سب سے بڑی اور سب سے نمایاں حیثیت ان کی مضمون نگاری اور مقالہ نویسی ہے وہ اپنے دور کے بڑے اور اعلیٰ مضمون نگار تھے۔ انہوں نے اپنی زندگی میں سینکڑوں مضامین اور طویل مقالے انتہائی تحقیق و تدقیق، محنت و کاوش اور لیاقت و قابلیت سے لکھے، اور اپنے پیچھے نادر و تحقیقی مضامین اور بلند پایہ مقالات کا یک عظیم ا لاشان ذخیرہ چھوڑ گئے۔سر سید کے مضامین میں حقا ئق بھی ہیں اور ادبی لطائف بھی، سیاست بھی ہے اور معاشرت بھی، اخلاقیات بھی ہے، مزاح بھی ہے طنز بھی، درد بھی ہے سوز بھی، دلچسپی بھی ہے دلکشی بھی، نصیحت بھی ہے سرزنش بھی الغرض ان کی تحریریں ہر موضوع پر لکھنے اور تحقیق کرنے والوں کے لیے رہنما ئی کا بہترین ماخذ ہیں۔ جہاں تک ان کی تصانیف و تالیفات کا تعلق ہے وہ تعداد اور معیار کے اعتبار سے مختلف شعبہ جات میں رہنما ئی کررہی ہیں۔
الطاف حسین حالیؔ نے ”حیات جاوید“ میں لکھا کہ سر سید احمد خان نے اپنی کتاب ’آئینِ اکبری‘ 1855ء میں مکمل کی۔ انہوں نے محسوس کیا کہ مرزا غالبؔ ایک ایسی شخصیت ہیں کہ جو ان کی اس علمی کا وش اور محنت کو قدر کی نگاہ سے دیکھیں گے۔ سر سید نے مرزا غالبؔ سے رابطہ کیا کہ وہ اس کتاب کی تقریظ (اس وقت کی روایت کے مطابق ثنائیہ پیش لفظ) تحریر کردیں۔غالبؔ نے سر سید کی حوصلہ شکنی نہیں کی بلکہ ان کی کاوش کو وقعت کی نگاہ سے دیکھا۔ غالبؔ نے کتاب کا احاطہ کرتے ہوئے اپنے طور پر ایک اصلاحی نظم لکھی جو فارسی میں تھی۔سرسید نے اس تقریظ کو آئین اکبری میں شامل کرنا مناسب نہ سمجھا۔ یہ نظم سر سید کی کتاب آئینِ اکبری‘ کا پیش لفظ یا تقریظ ضرور ہے لیکن اس کتاب کا حصہ نہیں۔ یہ دیباچہ یا مثنوی تعریفی نہیں بلکہ اس میں مصنف کی سرزنش بھی کی گئی اور بہت سے مفید مشورے غالبؔ نے سرسید کو دئے۔ دیباچہ نگاری کے سفر میں یہ اہم پیش رفت تھی اور غالب ؔ کی جانب سے دیباچہ نگاروں کو یہ پیغام بھی تھاکہ دیباچہ یا تقریظ صرف ثنائی ہی نہیں ہونی چاہیے بلکہ اصلاحی یا تنقیدی بھی ہوسکتی ہے۔
سر سید کا شمار ایسے ذہین اشخاص میں ہوتا ہے کہ جو خداداد صلاحیتوں کے مالک ہی نہیں بلکہ طبعی طو ر پر ذہین ہوتے ہیں۔ وہ جدید علم الکلام کے خالق تصور کیے جاتے ہیں۔ انہوں نے اپنی بات کو، نظریات کودلائل کے ساتھ، علم و فراست کی روشنی میں، قرآنی موضوعات کو سائنسی اصولوں کی روشنی میں بیان کرنے کے لیے تحریر کاسہارا لیا۔ وہ زبانی جمع خرچ کرنے والے انسان نہ تھے بلکہ ایک پریکٹیکل انسان تھے جو بات کہنا چاہتے اپنی تحریر کے ذریعہ لوگوں تک پہنچا تے۔ وہ انسان کی بھلائی اور بہتری کے خواہش مند تھے۔ مسلمانوں کی ترقی اور آگے بڑھنے کے خواہش مند تھے۔ اس کے لیے انہوں نے بھر پور طریقے سے اپنے قلم کا سہارا لیا، اسے استعمال کیا اور کامیاب و کامران ہوئے۔ علی گڑھ تحریک کے فیض سے دنیا ایک طویل عر صے تک فیض حاصل کرتی رہے گی۔ سرسید کے قائم کردہ اداروں سے فیض حاصل کرنے والوں نے ہندوستان میں ہی نہیں بلکہ پاکستان میں بھی نمایاں خدمات انجام دیں۔ علی گیرین ہونا ایک اعزاز تصور کیا جاتا ہے۔ سرسید ہماگیر اور کثیرالا قسم خصوصیات اور اوصاف کے حامل تھے۔ ایسے لوگ دنیا میں کم کم پیدا ہوتے ہیں۔معروف شاعر اکبر
الہٰ آبادی نے سر سید احمد خان کی متعدد خوبیوں کو خوبصورتی سے منظوم کیا ہے ؎
ہماری باتیں ہی باتیں ہیں سید کا م کرتا تھا
نہ بھولو فرق جو ہے کہنے والے کرنے والے میں
کہے جو چا ہے کوئی میں تو یہ کہتا ہوں اے اکبرؔ
خدا بخشے بہت سے خوبیاں تھیں مرنے والے میں
(17اکتوبر2023) |