|
ہمارے زندگی میں دعا کی بڑی اہمیت ہے مگر افسوس کی بات ہے
کہ آج کے مصروف ترین دور میں ہمارے لئے دعا کےلئے وقت ہی نہیں رہ ہے
حالانکہ اسلامی تعلیمات کے مطابق دعا سے تقدیر تک بدل جا سکتا ہے مگر اس کے
لئے خلوص دل سے دعا مانگنا شرط ہے ۔رمضان المبارک میں دعا تو لازمی قبول ہو
جاتی ہے مگر بات وہاں ہی آ جاتی ہے کہ ہم دنیاوی کا م کاج سے ہٹ کر محض
اللہ تعالی سے لو لگا کر اس سے مانگنے کی کوشش کریں تو وہ ذات ضرور عطا
کرتی ہے اور جب آنکھ سے آنسو ٹپک پڑے تو یہ کیسے ہو سکتا ہے کہ وہ ذات جو
ستر ماوں سے زیادہ ہم سے محبت رکھتی ہے ہماری نہ سنے مگر اس کے لئے ہمیں
اسے اپنے حال دل سنانا ہوگا بن مانگے تو مل ہی جاتا ہے اکثر ہمیں اس سے
مانگنا چاہیے کہ بہت سے تقدیر میں لکھے فیصلے دعا کے ذریعے تبدیل ہو جاتے
ہیں اور یہاں میں یہ بات بالخصوص اعتکاف میں بیٹھنےوالوں سے ضرور کہنا
چاہوں گا کہ دوران اعتکاف عبادت تو کرتے ہی رہیں مگر کچھ وقت دعا کو بھی
دیں تاکہ ہمیں احساس ہو کہ ہم گناہ گار اسی کے ہی محتاج ہیں وہ سب کی
مرادیں پوری کرنے والا ہے۔
دعا کے حوالے سے ہی ایک واقعہ پیش خدمت ہے ۔
ایک غریب خاندان کے لڑکے نے اپنے باپ سے کہا۔ میرے لئے بائیسکل خرید دیجئے
باپ کے لئے بائیسکل خریدنا مشکل تھا۔ اس نے ٹال دیا ۔ لڑکا بار بار کہتا
رہا اور باپ بار بار منع کرتا رہا۔ آخر کار ایک روز باپ نے ڈانٹ کر کہا میں
نے کہہ دیا کہ میں بائیسکل نہیں خریدوں گا۔ آئندہ مجھ سے اس قسم کی بات مت
کرنا۔’’ یہ سن کر لڑکے کی آنکھ میں آنسو آگئے ۔ وہ کچھ دیر تک چپ رہا۔ اس
کے بعد روتے ہوئے بولا
.............. آپ ہی تو ہمارے باپ ہیں پھر آپ سے نہ کہیں تو کس سے کہیں
.............
’’ اس جملہ نے باپ کو تڑپا دیا ۔ اچانک اس کا انداز بدل گیا۔ اس نے کہا ‘‘
اچھا بیٹے ، اطمینان رکھو۔ میں تم کو ضرور بائیسکل دوں گا۔’’ یہ کہتے ہوئے
باپ کی آنکھوں میں آنسو آ گئے۔ اگلے دن اس نے پیسہ پورا کر کے بیٹے کے لئے
نئی بائیسکل خرید دی۔
لڑکے نے بظاہر ایک لفظ کہا تھا۔ مگر یہ ایسا لفظ تھا جس کی قیمت اس کی اپنی
زندگی تھی۔جس میں اس کی پوری ہستی شامل ہو گئی تھی۔ اس لفظ کا مطلب یہ تھا
کہ اس نے اپنے آپ کو اپنے سرپرست کے آگے بالکل خالی کردیا ہے۔ یہ لفظ بول
کر اس نے اپنے آپ کو ایک ایسے نقطہ پر کھڑا کر دیا جہاں اس کی درخواست اس
کے سرپرست کے لئے بھی اتنا بڑا مسئلہ بن گئی جتنا وہ خود اس کے اپنے لئے
تھی۔
یہ انسانی واقعہ خدائی واقعہ کی تمثیل ہے۔ اس سے معلوم ہوتا ہے کہ وہ کون
سی دعا ہےجو لوٹائی نہیں جاتی۔ یہ وہ دعا ہےجس میں بندہ اپنے پوری ہستی کو
انڈہل دیتا ہے ۔ جب بندہ کی آنکھ سے عجز کا وہ قطرہ ٹپک پڑتا ہے جس کا تحمل
زمین و آسمان بھی نہ کر سکیں ۔جب بندہ اپنے آپ کو اپنے رب کے ساتھ اتنا
زیادہ شامل کرلیتا ہے تویہ وہ لمحہ ہوتا ہےجب کہ دعا محض زبان سے نکلا ہوا
ایک لفظ نہیں ہوتی بلکہ وہ ایک شخصیت کے پھٹنے کی آواز ہوتی ہے۔ اس وقت
اللہ کی رحمتیں اپنے بندے پر ٹوٹ پڑتی ہیں۔ بندگی اور خدائی دونوں ایک
دوسرے سے راضی ہو جاتے ہیں۔ قادر مطلق عاجز مطلق کو اپنی آغوش میں لےلیتا
ہے۔ دعا ہی وہ عمل ہے جو ہماری زندگیوں کو بدلنے کی طاقت رکھتی ہے تو خود
بھی دعا کیجئے ،کروائیے اور اپنی عبادات میں اس کا بھی کچھ وقت رکھئے تاکہ
ہمارےدل و سکون اطیمنان اللہ تعالی پر بھروسہ کی وجہ سے آئے کہ وہ ہماری سن
چکا ہے تو لازمی اب ہمارے حق میں بہتری آئے گی۔ |