مسلسل کوشش زندگی کا دوسرا نام
ہے - اِسی طرح مایوس ہونا یا نااُمید ہو جانا موت کے مترادف ہے - یہی وجہ
ہے کہ جانِ کائنات ﷺ نے اپنی اُمت کی تعلیم کے لیے فرمایا - ''اگر قیامت
برپا ہو جائے اور تمہارے ہاتھ میں ایک پودا ہو تو اُسے زمین میں لگا دو'' -
سوچ کا یہ انداز مثبت طرزِ عمل کہلاتا ہے - اگر ایک گلاس پانی سے آدھا بھرا
ہوا ہو - تو آدھے خالی کو مت دیکھو - آدھے بھرے ہوئے پر نظر رکھو - کسی
زیادتی پر بدلہ لینے کی سوچ منفی ہے - معاف کرنے کی سوچ مثبت ہے - حسد کا
جذبہ منفی ہے - رشک اور کوشش مثبت طرزِ عمل کا نام ہے - ایک اُستاد کمرہ
جماعت میں داخل ہوا - بورڈ پر چاک سے ایک لائن لگا دی - طلباء کی طرف دیکھا
اور سوال کیا - تم میں سے کوئی اِس لائن کو چھوئے بغیر چھوٹا کر سکتا ہے؟ -
تمام شاگرد ایک دوسرے کی طرف دیکھنے لگے - نفی میں سر ہلا دئیے - ایک شاگرد
نے کہا - ایسا ناممکن ہے کہ اِس لائن کو چھوئے بغیر چھوٹا کر دیا جائے -
اُستاد مسکرایا - چاک پکڑا - اُس لائن کے متوازی ایک چھوٹی لائن لگا دی -
معنی خیز نظروں سے جماعت کی طرف دیکھا - اِس ایک عمل نے بہت کچھ سکھا دیا -
مقابلے میں کسی سے آگے نکلنے کے لیے ضروری نہیں کہ اُسے گرایا جائے - کسی
کو مت گراؤ - خود آگے نکل جاؤ - یہی مثبت طرزِ عمل آگے لے جانے کا باعث بن
جاتا ہے - تنظیم میں اپنے مورال کو بلند رکھنا بے حد ضروری ہوتا ہے - ذمہ
داری جتنی اعلیٰ ہو - مورال بلند رکھنے کی استطاعت اُتنی زیادہ مضبوط ہونی
چاہیے - ایک سپاہی نے بہت زیادہ گھبرائے ہوئے انداز میں آ کر کمانڈر کو
بتایا - ہم چاروں طرف سے دشمن کے گھیرے میں آ چکے ہیں - کمانڈر نے نہایت
سکون سے جواب دیا - اچھا بہت خوب، اِس کا مطلب ہے کہ اب ہم چاروں طرف حملہ
کر سکتے ہیں - مثبت طرزِ فکر سے ہی مورال بلند رکھنے کے لیے قوت حاصل کی جا
سکتی ہے - مبلغ کے لیے یہ ایک ضروری سبق ہے - خادم مرکز محفل میلاد کو
چاہیے کہ اِس نکتے پر کاربند رہے - نگران اپنے مورال کو مضبوط رکھے - تحصیل
امیر - ضلعی امیر - بلکہ دیدہ بینا کے یہ الفاظ پڑھنے والا ہر قاری اپنی
شخصیت میں نکھار پیدا کر سکتا ہے - ہمارے مرشد حضرت صاحب کرماں والے رحمة
اللہ علیہ کی بارگاہ میں اکثر لوگ آ کر عرض کیا کرتے - حضور! ڈاکٹروں نے
مجھے جواب دے دیا ہے - آپ اطمینان سے ارشاد فرماتے - ''بیلیا! رب کریم نے
تو جواب نہیں دیا، اللہ کریم خیر فرما دے گا'' - پھر واقعی رب کریم خیر
فرما دیتا - قرآن کہتا ہے کہ اللہ کے ولی بھی تمہارے مددگار ہیں - اِس سے
بڑی مدد اور کیا ہوگی کہ ایک درماندہ و مایوس آدمی - اپنے خالق و مالک کی
رحمت پر یقین پختہ کر لے - اُمید باندھ لے - پھر اُس کا بیڑا پار ہو جائے -
حضرت صاحب کرماں والے رحمة اللہ علیہ کی تربیت کا یہ انداز جداگانہ اور بے
مثال نظر آتا ہے - اِسی لیے گزشتہ کئی سال سے ماہنامہ ''مجلہ حضرت کرماں
والا'' مسلسل شائع ہو رہا ہے - کہیں حالات کی تپش نے جھلسانے کی پوری کوشش
کی - کہیں اپنوں بیگانوں کی بے التفاتی آڑے آئی - مگر پُر اُمید رہنے کا
سبق یاد رکھا - دیگر کاموں کی طرح - اِس کے لیے بھی پیدا ہونے والے بے شمار
مسائل کے پیش ِ نظر ھدیہ میں اضافہ کیا گیا ہے - کیونکہ اگر بے فائدہ -
بدبودار - موت کا سامان سگریٹ پان - تیزابی خاصیت والی کولڈ ڈرنکس وغیرہ
وغیرہ - بلاضروری اخراجات کے لیے سب اچھا ہے - تو پھر یہ بھی محض ایک مجلہ
یا رسالہ ہی نہیں - دوائے عشقِ رسالت ِ مآب ﷺ کا ایک مآخذ بھی ہے - دعوت و
تبلیغ کا ایک ستون بھی ہے - آئیے! اِسے چمکانے اور نکھارنے کے لیے ہمارا
بھرپور ساتھ دیجئے - ہمارے ساتھ مل کر جہد ِ مسلسل کرنے کا اعادئہ عہد کریں
- قرآن سچا، ہر وعدہ سچا، ہر آیت سچ، ہر لفظ حق - ہر حرف میرا یقین ہے -
چنانچہ مومنین بھی اللہ کریم جلشانہ' کی توفیق سے مددگار ہیں - آپ کی سوچوں
کے تلاطم میں اُٹھنے والی ہر مثبت سوچ ضمیر کی آواز ہے - اُسے دبانے کی
بجائے ہر خوابیدہ مقدر تک پہنچانے کی کوشش کریں - آستانہ عالیہ حضرت کرماں
والا شریف میں تربیتی اعتکاف میں شمولیت کی دعوت دیں - کیونکہ
یقیں محکم، عمل پیہم، محبت فاتح ِ عالم |