(Chiraghdeen, Karachi)
Rasool-E-Pak (S.A.W.) Ne Irshad Fermaya Keh Maidan-E-Hashar Mein Ek Shakhs Hazir Hoga Jiskey Saath Gunahon Key 99 Dafter Hongey Aur Inmein Sey Her Dafter Itna Bara Hoga Keh Agar Usko Phelaya Jaey Tau Zameen O Aasman Usmein Chhup Jaein. Bargah-E-Khudawandi Mein Jab Uski Paishi Hogi Aur Uskey Gunahon Key Wo Dafter Bhi Saamney Rakhey Jaeinge Tau Wo Unhein Dekhker Intehai Pareshan Hoga Aur Khayal Karega Keh Aaj Tau Meri Nijaat Ki Koi Soorat Nahi. Isi Isna Mein Bargahe Khudawandi Sey Awaz Aaeygi Keh Ey Mere Bande Kia Yeh Saarey Gunah Too Ney Kiye They? Tau Wo Intyehai Khof Aur Pareshani Key Aalam Mey Eyteraaf Kareyga Keh Han Yeh Mein Ney Hi Kiye Hein. ALLAH Pak Fermaeinge Keh Kia Terey Paas Koi Uzer Hey? Tau Wo Arz Kareyga Keh Ya ALLAH Koi Uzer Nahi. ALLAH Pak Fermaeinge Keh Terey Inn 99 Deftaron Mein Ek Naiki Bhi Hey Aur Wo Hey Kalma-E-Tauheed Yani "LA ILAHA ILLALLAH MUHAMMADUR RASOOLULLAH", Irshad-E-Khudawandi Hoga Keh Jao Aur Iss Naiki Ka Wazan Karao. Wo Banda Arz Kareyga Keh Ya ALLAH Aap Mujhey Kion Ruswa Kerrahey Hein? Mere Gunahon Key Inn 99 Deftaron Key Muqaabley Mein Yeh Ek Naiki Kia Karegi? Tau ALLAH Pak Fermaeinge Keh "LA ZULM ALYOM" Yani Aaj Keh Din Kisi Per Koi Zulm Na Hoga, Tum Jaker Apni Naiki Wazan Tau Karao? Aur Apney Saamney Karao Takeh Tumharey Dil Mein Yeh Khayal Paida Na Hokey Kahein Farishton Ney Tumharey Saath Koi Zulm Tau Nahi Kerdia? Yeh Shakhs Phir Arz Karega Keh Ya ALLAH! Mujhey Aur Ruswa Na Karein, Yeh Ek Naiki Mere Inn Gunahon Key Muqabley Mein Kia Wazan Laeigi? Tau ALLAH Pak Fermaeinge Keh Tu Jato Sahi Chunacha Yeh Shakhs Wazan Kerwaney Chalajaeyga, Tarazoo Key Ek Palrey Mein Gunahon Key 99 Defter Honge Jabkeh Doosrey Palrey Mein Yeh Ek Naiki Hogi Tao Yeh Shakhs Yeh Dekhker Hairaan Hojaeyga Keh Buraiyon Aur Gunahon Key 99 Daftaron Wala Palra Uth Jaeyga Aur Ek Neki Wala Palra Jhuk Jaeyga, Chunacha ALLAH Pak Ki Taraf Sey Hukm Hoga Keh Yeh Shakhs Jannati Hey Aur Iski Wajah ALLAH Pak Bayan Fermaeinge Keh "WALA ZIKRULLAH-E-AKBAR" Yani ALLAH Ka Zikr Sab Sey Wazni Hey. FAEDA: Jis Cheez Ney Itney Barey Gunahgar Ko Jannat Ka Waris Banadia Wo DIL KA IKHLAAS Hey. Ikhlaas O Lillahiyet Ki Bunyaad Per Kia Janey Wala Chhotey Sey Chhota Amal Bhi Insaan Ki Ukhrawi Nijaat O Kamrani Ka Zeenah Ban Sakta Hey. Jabkeh Reyakari Ki Bunyaad Per Kia Janey Wala Barey Sey Bara Naik Amal Bhi Jahannam Ka Sabab Ban Ker Hamesha Hamesha Ki Zillat O Berbadi Ka Moojib Ban Sakta Hey, ALLAH Pak Ham Sab Musalmano Ko Ikhlaas Ki Daulat Naseeb Fermaey Aur Naiki Key Her Kaam Mein Barh Charh Ker Hissa Leney Ki Taufeeq Ata'a Fermaey Chahey Wo Koi Chhota Hi Amal Kiyoon Na Ho. IKHLAS Ka Matlab Hey Keh Wo Kaam Mehez ALLAH Ki Raza Key Liye Ho, Bando Ko Dikhaney Key Liye Na Ho Yahi Apney Naam-O-Namood Ki Khowahish Dil Mein Paida Naho. ALLAH Pak Hamein Her Naik Amal Mehez ALLAH Ki Raza Key Liye Kerney Ki Taufeeq Ata'a Fermaey, Aameen.