سلطان الہندخواجہ معین الدین حسن چشتی

(Md Jahangir Hasan Misbahi, Loralai)

سلطان الہند،عطائے رسول خواجہ معین الدین حسن چشتی قدس سرہٗ برصغیرہندوپاک میں چشتی سلسلے کے روح رواں اور بانی ہیں۔برصغیرجوکفروشرک میں ڈوبا ہواتھا، آپ کی بدولت نورِہدایت سےسیراب ہوا۔چنانچہ اس حقیقت سے کسی کو مجالِ انکار نہیںکہ پورے برصغیرمیں جہاں بھی دین اسلام کی اشاعت عام ہوئی،اس میںسلطان الہند قدس سرہٗ کا ہی فیض ہدایت کارفرما ہے۔

نام ونسب اورولادت:حضرت خواجہ قدس سرہٗ کا نام حسن،لقب،معین الدین، سلطان الہند، غریب نواز،عطائے رسول ہے۔آپ ایک دین داراور علمی گھرانے سے تعلق رکھتے تھے۔آپ نجیب الطرفین سید ہیں۔والد کا نام غیاث الدین ہے۔سیستان کے قصبہ سنجر میں۵۲۷ہجری کو پیدا ہوئے۔

تعلیم وتربیت:سلطان الہند قدس سرہٗ کی نشو و نما’’خراسان‘‘میں ہوئی۔ آپ بچپن ہی سے نرم دل اور شریف طبیعت کے مالک تھے۔ آپ کی طبیعت عام بچوںکی عادت اور مزاج سے یکسرجدا تھی۔ بچپن ہی سےآپ کے اندر وہ تمام آثارنمایاں تھے جو ایک مردِ مومن کی علامت اور پہچان ہوتی ہے۔

جب پندرہ سال کے ہوئے تو والد بزرگوارحضرت غیاث الدین کا سایہ سر سے اٹھ گیا۔ ترکہ میں ایک باغ ملاہوا تھا،اسی کی نگہبانی کیا کرتے تھے۔

ایک دن شیخ ابراہیم قندوزی نامی بزرگ باغ میں آئے۔آپ نے ان کوبڑی عزت دی، اور احترام کے ساتھ بٹھایا، پھراُن کی خدمت میں انگور کے چندخوشے پیش کیے، آپ نےانگورتناول نہیں فرمایا۔ البتہ!کھلی کا ایک ٹکڑا کھاکر دیا۔اس کھلی کا کھانا تھا کہ حضرت کا دل انوار الٰہی سے معمور ہوگیا۔ علائق وخلائق سے ترک تعلق کرلیااور طلب حق کے لیے اٹھ کھڑے ہوئے، سمرقندوبخارا پہنچے،جہاں کلام مجید حفظ کیا اور علوم ظاہری کی تکمیل بھی فرمائی۔(مرأۃ الاسرار،ص:۵۹۳-۵۹۴،۱۹۹۷)

بیعت وخلافت اور خدمت شیخ: تعلیم مکمل کرلینے کے بعدسلطان الہند قدس سرہٗ مقصداَصلی کی حصولیابی کے لیےبغداد تشریف لے گئے۔ معلوم کرنےپرپتاچلاکہ اس شہر میں خواجہ عثمان ہارونی قدس سرہٗ سےبڑی شخصیت کوئی نہیں۔چنانچہ آپ خواجہ ہارونی کی خانقاہ پہنچے،وہ نماز کے لیےمسجدجنیدبغدادی گئے ہوئے تھے،آپ بھی وہیںچلے گئےاور قدم بوسی کا شرف حاصل کیا۔اس وقت مسجد میں عظیم مشائخ موجودتھے۔خواجہ عثمان نے فرمایاکہ اے معین الدین! دوگانہ اداکرو اور قبلہ رُخ بیٹھ جاؤ۔آپ نے ایسا ہی کیا، پھر فرمایاکہ چہرہ آسمان کی طرف اُٹھاؤ،اور آپ کا ہاتھ پکڑکر فرمایاکہ میں نے تجھے اللہ تک پہنچادیا۔اس کے بعدآپ کے سرپرکلاہِ ارادت رکھی، خرقۂ خاص عطافرمایا،پھرفرمایاکہ معین الدین!ایک ہزاربار سورۂ اخلاص پڑھو،اورایک دن،اورایک رات کا مجاہدہ کرو، آپ نے ایسا ہی کیا۔آپ اسی مجاہدے میں مشغول تھے کہ سامنے سے تمام حجابات اٹھادیے گئے۔پھر عثمان ہارونی نے آپ کوخلافت عطافرمایا اورتمام طریقۂ مشائخ کی تلقین بھی کی ، اس کے بعد آپ کا ہاتھ پکڑا،اوریہ دعاکی کہ یااللہ!معین الدین کو قبول فرمااوراسےاپناقرب عطافرما۔آواز آئی کہ معین الدین ! تو ہماری بارگاہ میں مقبول ہے، تمہارا نام محبوبوں کے فہرست میں شامل کردیااورمشائخ کا امام بنادیا۔(سبع سنابل،سنبلہ:۷،سیر:۱۶،ص:۲۲۶)

اس طرح مرشد کی خدمت میںتقریباً بیس سال تک رہے ،طریقت و معرفت کی منزلیں طے کیںاور مرتبۂ کمال پرفائز ہوئے۔سلطان الہند قدس سرہٗ خود فرماتےہیں :
جب میں خواجہ عثمان ہارونی کی خدمت میں حاضر ہوا،تو میں بیس سال تک ان کی خدمت میں رہا۔ اس عرصے میں ایک لمحہ بھی میں ان کی خدمت سے غافل نہیں رہا۔ سفروحضر میں اُن کا بستراور سامان لے کر چلتا۔جب اُنھوں نے میرے خلوص و خدمت اور عقیدت و محبت کو ہر طرح سے محسوس کرلیا اپنے کمال کی نعمتوں سے مجھے سرفراز فرمادیا۔
(سیرالاولیاء،ص:۱۲۷)

پھرجب حضور نبی کریم صلی اللہ علیہ وسلم کےعشق ومحبت کی تپش بڑھی تو مدینہ طیبہ کا رُخ کیا۔آپ مدینہ طیبہ ہی میں تھے کہ بارگاہِ نبوی سے اشارہ ملا کہ ہندوستان جائو اور دین اسلام کی تبلیغ کرو۔

ہندوستان آمد:سلطان الہندقدس سرہٗ مختلف مقامات سے ہوتے ہوئے ہندوستان تشریف لائے۔آپ جس وقت یہاںتشریف لائے، اس وقت ہندوستان میں ہر طرف کفر و شرک کا بازار گرم تھا۔ انسانیت انسانوں کے ہاتھوں پامال ہو رہی تھی۔ لوگ ایک اللہ کی پرستش کے بجائے کئی خداؤں کا تصور رکھتے تھے اور طرح طرح کے خرافات میںمبتلا تھے۔ ایسے حالات میں آپ نے توحید و رسالت کا وہ صورپھونکا کہ پورا ہندوستان اس کی آواز سے گونج اُٹھا ۔

ہر دور میںہندوستان کے حکمرانوں کوسلطان الہندقدس اللہ سرہٗ سے بے پناہ عقیدت و محبت رہی۔تاریخی دستاویزات کے ساتھ ساتھ، درگاہ معلی اجمیر شریف میںان بادشاہوں کی حاضری، تعمیرات اور نذر و نیاز جیسے اعمال اس کے شواہد ہیں۔

ازدواجی زندگی:سلطان الہندقدس سرہٗ کی دو شادیاں ہوئیں، جن میں ایک ’’عصمت بی بی‘‘ جو اجمیرکے گورنر کی بیٹی تھیں اور دوسری ایک ہندو راجہ کی لڑکی ’’بی بی اَمۃاللہ‘‘ تھیں جو مشرف بہ اسلام ہو گئی تھیں۔ آپ کے دوصاحب زادے سید فخرالدین، اور سید حسام الدین تھے اور ایک صاحب زادی ’’بی بی حافظہ جمال ‘‘ تھیں۔
(مرأۃ الاسرار،ص:۶۰۲،۱۹۹۷)

مجاہدات اورفضل وکمال:ایمان کی اصل یہ ہے کہ مومن کے اندر رسول اکرم صلی اللہ علیہ وسلم کی محبت ماں ،باپ ، اولاد اور مال، بلکہ ہرچیزکی محبت سے زیادہ ہو،جس قدر رسول اللہ صلی اللہ علیہ وسلم سے محبت ہوگی اسی قدر ایمان میں مضبوطی آئے گی۔

سلطان الہند کے معمولات دیکھنے سے واضح ہوتا ہے کہ ان کی پوری زندگی عشق الٰہی اورعشق رسول میں گزری۔ اللہ عز وجل اور رسول اللہ صلی اللہ علیہ وسلم کا ذکر بہت ہی والہانہ انداز میں کرتے، ہمیشہ اس بات کا خوف رہتا کہ کہیںحقوق اللہ اور حقوق العباد میں کوئی کوتاہی نہ ہوجائےکہ اس کی وجہ سےکل قیامت میں اللہ عزوجل اور رسول اللہ صلی اللہ علیہ وسلم کے سامنے شرمندہ ہونا پڑے۔

حضرت شیخ میرعبدالواحد بلگرامی لکھتے ہیںکہ منقول ہے کہ خواجہ معین الدین حسن سجزی علم میںکمال رکھتے تھے۔آپ کی تصانیف خراسان کے اطراف واکناف میںبہت مشہور ہیں۔آپ ستر سال تک نہ توسوئے اورنہ ہی اپنی پشت زمین پر رکھی،اور رفع حاجت کے سوا ستر سال تک آپ کاوضو نہیں ٹوٹا۔آپ ہمیشہ آنکھیں بند کیےرہتے، صرف نماز کے وقت کھولتے،اور جس شخص پر بھی آپ نظر عنایت پڑجاتی وہ اللہ کاولی ہوجاتا ۔ آپ حافظ قرآن تھے۔ایک ختم قرآن دن میں اور ایک ختم قرآن رات میں کیا کرتے تھے،اور جتنی بار قرآن ختم کرتے ،ہر بارغیبی آوازآتی کہ ہم نے تمہارا ختم قرآن قبول کیا۔

خواجہ قطب الدین قدس سرہٗ فرماتے ہیں کہ خواجہ معین الدین چشتی کی مجلس میں بغداداور اطراف واکناف کےمشائخ عظیم ،مثلاًشیخ شہاب الدین سہروردی، شیخ احمد کرمانی، شیخ محمداصفہانی، مولانا احمدبغدادی،شیخ جلال الدین تبریزی،شیخ برہان الدین غزنوی،شیخ واحدکرمانی، خواجہ اجل سجزی،وغیرہ قدم بوسی کے لیےحاضر ہوتےاور آپ سے فیض یاب ہوتے تھے۔ (سبع سنابل،سنبلہ:۷،سیر:۱۶،ص:۲۲۶)

یوں تو ہر صوفی اورولی حلیم وبردباراور عفوودرگذر کا پیکر ہوتاہے لیکن سلطان الہند قدس سرہٗ کی یہ درویشانہ صفت کمال کو پہنچی ہوئی تھی۔جس طرح نبی کریم صلی اللہ علیہ وسلم تمام امت کے لیے ہمیشہ دعاکرتے رہتے تھےاسی طرزپرآپ اپنے مریدین ومتوسلین کے لیے دعائیں کرتےرہتے اور اپنے ایک ایک عمل سے سنت نبوی کاپیغام دیتے۔پڑوسیوں کا بھی اچھی طرح خیال رکھتے۔ جب کوئی ہمسایہ انتقال کرجاتا تو اُس کے جنازے میں شریک ہوتے۔ لوگ واپس لوٹ جاتے لیکن آپ دیر تک اس کی قبر کے پاس دعائیں کرتے رہتے۔ عذاب قبر کا خوف بھی آپ میں حد درجہ تھا، جب کبھی قبر کا ذکر آتا توآپ چیخیں مار کر رو پڑتے۔

چشت اہل بہشت:سلطان الہند خواجہ غریب نواز قدس سرہٗ فرماتے ہیںکہجو میرامریدہوا،یا میرے فرزندوں کا مرید ہوا،معین الدین اُس کو لیے بغیر بہشت میں قدم نہیں رکھے گا۔آپ سےپوچھا گیاکہ فرزندان سے آپ کے خلفا مراد ہیں یا آپ کی اولاد؟آپ نے فرمایاکہ فرزندان سے میری مراد قیامت تک کے میرے تمام مریدین ہیں۔

مزید فرماتے ہیںکہ ایک دن میں حرم کعبہ میں مشغول عبادت تھا کہ ہاتف غیبی نے آوازدی کہ معین الدین!ہم تم سے خوش ہیںاور ہم نے تمہارے اہل بیت کو بخش دیا۔

میں مسرور ہوگیا۔میں نے عرض کیاکہ الٰہی!میری ایک اور خواہش ہے ، فرمان ہواکہ مانگوقبول ہوگی۔میں نے عرض کیاکہ الٰہی!جو معین الدین کا مرید ہو،اور معین الدین کے مریدوں کا مرید ہو،اُس کو بھی بخش دے۔ ہاتف غیبی نے آواز دی کہ معین الدین! جو تمہارا مرید ہوا، اور قیامت تک تمہارے مریدوں کامرید ہوا، ہم نے سب کو بخش دیا۔
(سبع سنابل،سنبلہ:،۷،سیر:۱۶،ص:۲۲۶)

ذوق سماع:حضرت میرعبدالواحدبلگرامی لکھتے ہیںکہ سماع اور رقص اخلاق صوفیہ میںسے ہے،اسی لیے خواجگان چشت اہل بہشت سماع کا نہایت اعلیٰ اور پاکیزہ ذوق رکھتے تھے۔ چنانچہ خود سلطان الہند قدس سرہٗ سماع کے دلدادہ تھے اور آپ کی محفل سماع میں بڑے بڑے علماو مشائخ شریک ہوتے تھے۔

حضرت میرعبدالواحد بلگرامی لکھتے ہیںکہ خواجہ معین الدین سماع کا ذوق رکھتے تھےاور خوب سماع سنتے تھے۔جو بھی خواجہ قدس سرہٗ کی پاک صحبت میں رہتا وہ بھی صاحب سماع اور اُس کا اہل ہوجاتا۔ (سبع سنابل،سنبلہ:۷ویں،سیر:۱۶ویں)

سماع، درحقیقت اسرارِ حق اور معرفت الٰہی حاصل کرنے کا بہترین ذریعہ ہےکہ سماع میں اللہ اور بندے کے درمیان کے سارے حجابات اٹھتے چلے جاتے ہیں۔ پھرجب بندے پرعشق الٰہی کا غلبہ ہوتاہے اوراللہ کی ہیبت و خشیت اس پر طاری ہوتی ہے تواُس کا قلب انواروتجلیات سے بھرجاتاہے اور وہ و جدوسرور کی ایمانی کیفیت سے سرشارنظرآتا ہے۔

سماع آلۂ تبلیغ :چوں کہ سلطان الہند قد س سرہٗ سماع کا بے حدذوق رکھتے تھے،اور ہندوستان آئے توپایاکہ یہاںکے لوگ ہر چھوٹی بڑی مذہبی رسومات میں نغمہ کااستعمال کرتے ہیں،چنانچہ نغمہ میں لوگوںکی اسی دلچسپی کے پیش نظرہندوستان میں سماع خاص دعوت وتبلیغ کے لیےآلہ بھی بن گیا۔

اس کانتیجہ یہ نکلاکہ کفارومشرکین نغمہ سے اُنسیت اورلگاؤ رکھنے کی بناپرآپ سےقریب ہونے لگے،اس طرح اُن لوگوں نےآپ کے حسن سلوک کا مشاہدہ کیااورآپ کی موہنی صورت پرفریفتہ ہوگئے، جس کی وجہ سے آہستہ آہستہ ان کے دلوں میں ایمان راسخ ہوتا چلاگیااور زبان حال سےیہ کہنے پر مجبور ہوگئے کہ؎
زبان عشق می باید چہ ایرانی چہ سریانی

تصانیف: سلطان الہندخواجہ معین الدین چشتی قدس سرہٗ کی جانب جن تصانیف کو منسوب کیاجاتا ہے وہ مندرجہ ذیل ہیں:
۱۔انیس الارواح ۲۔ گنج اسرار ۳۔کشف الاسرار ۴۔دلیل العارفین

اول الذکر خواجہ عثمان ہارونی قدس سرہٗ کے ملفوظات پر مشتمل ہے ۔جب کہ آخرالذکرسلطان الہند قدس سرہٗ کی تعلیمات پر مشتمل ہے، جس میں اخلاق، نماز، روزہ، تلاوت، معرفت کی باتیںاور سلوک کے مقامات وغیرہ کا ذکرمختصر اورجامع طورپرہے۔

وصا ل مبارک:منقول ہے کہ سلطان الہندقدس سرہٗ عشا کی نماز پڑھ کر اپنے حجرے میں گئےاور دروازہ بندکرلیا،کچھ دیر بعدآپ پر ایک وجد کی کیفیت طاری ہوگئی اور اِسی وجد کے عالم میں ۶؍رجب ۶۳۳کو اَخیر ِشب میں روح پُرفتوح پرواز کر گئی ۔

آپ کے انتقال پُرملال کے وقت بعض بزرگوں نے حضور نبی کریم صلی اللہ علیہ وسلم کوخواب میں یہ فرماتے ہوئے دیکھاکہ اللہ کا دوست معین الدین آرہا ہے،ہم اس کے استقبال میں کھڑے ہیں،نیزیہ بھی دیکھاگیاکہ آپ کی پیشانی پرحَبِیْبُ اللہِ مَاتَ فِی حُبِّ اللہِ۔ لکھاتھا،یعنی اللہ کے دوست نےاللہ کی محبت میں وفات پائی۔ (سیرالاولیاء،ص:۱۳۱)

تعلیمات وارشادات:
ث اہل محبت کی علامت یہ ہے کہ اللہ کے سوا کسی کا مطیع و فرماں بردار نہ ہو ،اور کسی سے ڈرکر اس کے حکم پر نہ چلے۔
ث شقاوت کی علامت یہ ہے کہ تو گناہ کرے اور امید رکھے کہ تو مقبولانِ بارگاہ میںسےہے۔(سیرالاولیاء،ص:۱۲۷)
ثنیک لوگوںکی محبت نیکی کرنے سے بہتر ہے اور بُرے لوگوں کی صحبت بُرائی کرنے سے بدتر ہے۔(اخبارالاخیار،ص:۵۶)

اس راہ میں سکون حاصل کرنے کے لیے دوچیزیں ہیں: ایک عبودیت اور دوسرے حق تعالیٰ کی تعظیم۔

ث حق تعالیٰ کی معرفت کی علامت مخلوق سے بھاگنا ہے اور معرفت میں خاموش رہنا ہے۔

ث قیامت کے دن حق تعالیٰ فرشتوں کو حکم دےگاکہ دوزخ کو سانپ کے منھ سے نکالیں۔اس وقت دوزخ کی آگ کو بھڑکایاجائےگا ،چنانچہ وہ ایک سانس لے گی تو تمام عالم حشر دھوئیں سے بھرجائےگا۔جو چاہتا ہے کہ اس دن کے عذاب سے مامون رہے اُسے چاہیے کہ ایسی طاعت کرے کہ اللہ کے نزدیک اُس سے بہتر اطاعت نہ ہو۔پوچھاگیاکہ وہ کون سی اطاعت ہے؟فرمایاکہ مظلوموں کی فریاد کو پہنچنا، حاجتمندوں کی حاجت پوری کرنا اور بھوکوں کو کھانا کھلانا۔

ث اللہ تعالیٰ اس کو دوست رکھتا ہےجو دریا کی طرح سخاوت،آفتاب کی طرح شفقت ،اورزمین کی طرح تواضع اختیار کرتا ہے۔

ث جس کسی نے نعمت پائی،سخاوت سے پائی اور جوترقی حاصل کرتا ہے ،وہ صفائے باطن سے حاصل کرتا ہے۔
ث حقیقت میں متوکل وہ ہے جو اپنی تکلیف کولوگوں کی طرف منسوب نہ کرے۔ (سیرالاولیاء،ص:۱۲۷-۱۲۸)

ث عاشق کا دل محبت کی آگ میں جلتارہتا ہے ،لہٰذاجو کچھ بھی اس دل میں آئے گا جل جائے گا اور نابود ہوجائےگا، کیوں کہ آتش محبت سے زیادہ تیزی کسی آگ میں نہیں۔

ثمرید اپنی توبہ میں اس وقت راسخ اور قائم سمجھا جائےگا جب کہ اس کے بائیں طرف والے فرشتے بیس سال تک اس کا ایک بھی گناہ نہ لکھیں۔

ثمحبت میں عارف کا کم سے کم مرتبہ یہ ہے کہ صفات حق اس کے اندر پیدا ہوجائیں،اور محبت میں عارف کا درجہ کامل یہ ہے کہ اگر کوئی اس کے مقابلے پر دعوی کرکے آئے تو وہ اپنی قوت کرامت سے اُسے گرفتار کرلے۔(اخبارالاخیار،ص:۵۶-۵۸)

< PREVIOUS معین الدین چشتی NEXT > اھلیہ مفتی احمد الرحمن