بنجول۔3مئی (اے پی پی):نائب وزیر اعظم اور وزیر خارجہ سینیٹر محمد اسحاق ڈار نے گیمبیا کے شہر بنجول میں او آئی سی کے 15ویں اسلامی سربراہی اجلاس کے موقع پر جمہوریہ یمن کے وزیر خارجہ ڈاکٹر شایع محسن الزندانی سے ملاقات کی۔ دفتر خارجہ کے مطابق انہوں نے دو طرفہ تعلقات اور علاقائی پیش رفت پر تبادلہ خیال کیا۔
نائب وزیراعظم نے یمن میں قومی مفاہمت اور سیاسی تبدیلی کے لیے پاکستان کی اصولی حمایت کا اعادہ کرتے ہوئے پاکستان کی یمن کے ساتھ تعلیم جیسے مختلف شعبوں میں تعاون کے مواقع تلاش کرنے کی خواہش کا اظہار کیا۔ دونوں رہنماؤں نے غزہ کی صورتحال پر بھی تبادلہ خیال کیا۔ انہوں نے کشیدگی میں کمی کے لیے عالمی برادری کی جانب سے فوری تدارک کے اقدامات پر زور دیا۔ انہوں نے اقوام متحدہ کی سلامتی کونسل سے غزہ میں فوری جنگ بندی اور مسئلہ فلسطین کے پائیدار تصفیے کے لیے اسرائیل کے خلاف اضافی اقدامات پر غور کرنے کا مطالبہ بھی کیا۔